Tŭ do, Dà Làc geh rlau 2 rbô 900 nơm hìu krơh geh lơh uă tàm jơh ală ù tiah 10 sơnam ƀòn tàm dơlam ƀòn dờng, geh tus rlau 60% ù tam biăp, bơkàu ƀòn dờng dê. Tềng đăp bơta geh ngan do, càr Lâm Đồng neh geh broă rơndăp lơh ntrờñ jơh ală hìu krơh lơh broă sa sươn sre mờ wèt tus nam 2030 rơ̆p ờ gam tai hìu krơh tàm dơlam ù tiah ƀòn dờng Dà Làc.

Nàng lơh jăt broă do, kờñ bơnah priă càn ờ sa priă cồng uă mờ khà priă gơguh tus 4 rbô 820 tơmàn đong nàng ntrờñ, dong kờl tam gơl chi tam tàm hìu krơh tus tam bơdìh trồ. Den tàng bè hơ̆, Sở Nông nghiệp mờ Phát triển Nông thôn càr Lâm Đồng dan mờ càr sồr Ngân hàng Dà lơgar Việt Nam càr Lâm Đồng kơlôi sơnơng, jăt ngui broă lơh ai càn priă hòi jà bơtàu tơnguh lơh broă sa sươn sre jăt ngui măy mok pa, lơh broă sa sươn sre sàng goh nàng kờñ pơlam gùng ală ngân hàng kă bro ai tơl bơta ai broă càn priă in, nàng kờñ lơh jăt broă rơndăp lơh ntrờñ hìu krơh lik bơh tàm dơlam ù tiah ƀòn dờng Dà Làc dê.