Pơrlòng jơh bơsram kấp pe nam do, càr Lâm Đồng geh rlau 14 rơbô 600 nă cau pơrlòng tus bal pơrlòng. Bal mờ ai 39 tiah pơrlòng, 670 cơldŭ pơrlòng tàm 12 kơnhoàl, ƀòn dờng tàm càr, càr Lâm Đồng kung rcang tơl làm ală bơta phan bơna, rơndeh rơndồ măy mok mờ mpồl cau gơguh tus rlau 2 rơbô 600 nă cau tus bal drơng broă tàm dơ̆ pơrlòng jơh bơsram kấp pe.

Nàng gàr niam dơ̆ pơrlòng geh bơyai lơh lơngap lơngai, ngai 27/06, Ủy ƀan Ñân zân càr Lâm Đồng neh geh sră nggal mhar sồr Sở Giáo dục mờ Đào tạo, Ủy ƀan Ñân zân ală kơnhoàl, ƀòn dờng mờ ală mpồl lơh broă geh gơnoar tơrgùm đờng lam rcang lài tơl làm, niam ngan ală bơta kờñ pal geh. Tàm hơ̆, ờ gŏ lời  cau pơrlòng lơi sang tĕ pơrlòng tài bơh ală bơta lòt rê halà lơh sa hìu bơnhă dê kal ke, ngan là ală cau pơrlòng ơm tàm tiah ngài, cau pơrlòng là làng bol kòn cau dùl ết nă cau, oh kòn gơwèt hìu bơnhă rƀah uă bơta.