Bơh lài mờ dơ̆ sa tềp bơhiàn dà lơgar dê tus tŭ do, tiah brê nho ƀươn gơtìp ồs sa tàm bă brê 263 gơwèt ù tiah xã Phúc Thọ, kơnhoàl Lâm Hà, càr Lâm Đồng sùm geh Mpồl ătbồ brê rơcăng gàr bồ tô dà Lâm Hà mờ ală hìu dờp sơngka sền gàr lơh pràn broă lơh lòt sền, gròi sền, ai cau lòt drơng sền sùm nàng gŏ di tŭ dilah geh ồs sa. Jăt ồng Dương Thanh Quang, Kwang ătbồ Mpồl sùm lơh kơnòl broă sùm 05, Mpồl ătbồ brê rơcăng gàr bồ tô dà kơnhoàl Lâm Hà yal, bơh bồ kàl prang tơn, kwang bàng bă brê do neh tơrgùm mpồl cau nàng lòt pès jơh ñhơ̆t hòn lềng, lơh gùng kơryan nàng kơryan ồs sa mờ lơh ală hìu kù nàng drơng sền ồs sa brê. Ồng Dương Thanh Quang, đơs: Oh mi bol añ jàu kơnòl, kờp sền wơl ală mpồl dờp sơng ka sền gàr brê nàng geh broă rơndăp lơh drơng sền ngai kung bè mang. Mơkung sơlơ ai tai mpồl cau nàng dong kờl tàm ală tiah pơhìn ồs sa uă bal mờ oh mi lòt sền sùm ngai kung bè mang.

Lâm Hà geh rlau 34 rbô lồ brê, uă ngan là bă brê tam ơm tàm bơrlŭ bal, rềp nhàr bal mờ mìr tam phan bơh làng bol dê den tàng pơhìn gơbàn ồs sa brê sùm geh. Ồng Hồ Nghĩa Nam, Phó Kwang ătbồ Mpồl ătbồ brê rơcăng gàr bồ tô dà kơnhoàl Lâm Hà, pà gĭt, bal mờ lơh pràn broă lòt sền, broă lơh mờ lam lơh dùl ròt ală broă rơndăp lơh rơcăng sơndră ồs sa brê gam geh mpồl sền gròi ngan lơh jăt. Ồng Hồ Nghĩa Nam, đơs: Mpồl ătbồ brê neh lơh kơnhăp wơl ală hìu kù drơng sền ồs mờ blơi bàr pe phan bơna nàng drơng ai broă lơh rơcăng sơndră ồs sa brê in. Tŭ do, ală mpồl sùm lơh kơnòl broă gam lơh sir ală broă, lơh bè lơi nàng tàm nam 2023 do ờ lời gơlik geh jơnau ồs sa brê.

            Lâm Đồng là tiah geh uă bă brê nho mờ ală bă brê ƀươn gơbàn ồs sa, mờ kờp jơh bă brê ơnàng 513 rbô lồ. Pa bồ kàl prang mơya càr neh geh 3 dơ̆ ồs sa chi che tềng hơđơm mƀur chi brê. Kơnờm gŏ mờ crùh gơ sơ̆t gờñ mờ di tŭ den tàng ờ lơh gơbàn hoàc hươr bè brê. Tŭ do, trồ tiah tàm càr Lâm Đồng gam ro kơnrañ, tơngai duh, pơhìn gơbàn ồs sa brê là uă ngan. Ủy ƀan Ñân zân càr Lâm Đồng neh geh uă sră nggal sồr ngan, sồr ală anih lơh broă, mpồl lơh broă geh gơnoar ờ gŏ di sền ờ sơ̆t, ờ gŏ rơcăng ngăc mờ pal tơrgùm lam lơh dùl ròt bal uă broă rơndăp lơh rơcăng sơndră ồs sa brê.