Jat jơnau rơcang cih rơndap ù tiah, jơnau sồr bơtàu tơnguh lơh sa jŏ jòng sùm bơh Tây Nguyên dê rơp geh lơh jat tàm broă ngui ală bơnha priă jền mờ bơta gơn kơnờm gơguh lơh sa pa dồ bă jŏ jòng sùm, bè lơh sa suơn sre pơgồp bal mờ tam gơl sồ; bơtàu tơnguh ală gah broă geh bơta pràn bè: lòt nhơl, lơh mờ măi mok lơh gơlik phan, năng lượng lơh geh wơl; ai niam chài Tây Nguyên gơ gơs là bơta gơn kơnờm, bơnàng jă ai bơtàu tơnguh mờ mut gơ rờm bal bơh ù tiah do dê in. Bơt bơtàu mờ bơtàu tơnguh tiah Tây Nguyên pal pơgồp bal bơnĕ bơnài đah bơtàu tơnguh lơh sa, niam chài, mpồl bơtiàn mờ sền gàr phan kuơ geh is, tiah ơm kis gơ jat bal đềt mềr mờ sền gàr dà lơgar, sền gàr lơngap lơngai, lơh broă mờ lơgar ndai.

Bè rơndap lơh ù tiah Tây Nguyên den tiah do geh rơndap gơs “3 gah – 3 tiah dềt – 5 gùng kềng”. Tàm hơ̆: 3 gah bơtàu tơnguh geh: ƀòn dờng Pleiku, ƀòn dờng Buôn Ma Thuột mờ ƀòn dờng Dà Làc. 5 gùng kềng lơh sa geh: Gùng kềng lơh sa tiah đah mat tơngai lik – tiah đah mat tơngai mut; gùng kềng lơh sa Bờ Y – Pleiku – Quy Nhơn; Gùng kềng Mundulkiri – Dăk Lăk – Phú Yên; Gùng kềng lơh sa jat gùng rơndeh ntoat mhar Buôn Ma Thuột – Khánh Hòa; Gùng kềng lơh sa jat gùng rơndeh ntoat mhar Dầu Giây- Dà Làc – Nha Trang; Gùng kềng lơh sa Bu Prăng – Gia Nghĩa- Bảo Lộc – Bình Thuận. Jat Thứ trưởng Ƀộ Nội vụ Nguyễn Trọng Thừa đơs, nàng lơh gơtùi ală tơngume bơh rơndap ù tiah dê, pal sền gròi tai tus bơta gùng dà, broă lơh ai tiah Tây Nguyên in: “Tàm do, añ gŏ gam ờ hềt tơl gùng dà, broă lơh. Bulah geh uă ngan nghị quyết, uă bơta sền gròi mơya tiah Tây Nguyên gam ờ tơl gùng dà. Jat añ sơnơng là gùng dà tàm do là kơlôi sơnơng nàng sền sơ wì gùng dà bơto pơla, broă lơh, bè lơh bal, bè bơta pràn bè hơ̆ ñchi bơh tài ờ hềt geh cau bơcri priă uă. Gùng dà, broă lơh geh bơta kòl yan lơi halà ờ, geh bơta niam lơi halà ờ nàng gơ hòi gơ jà cau bơcri priă. Jat añ den tàm jơnau sồr rơndap ù tiah do den gơtùi sồr geh 2, 3 broă lơh dong kờl nàng Tây Nguyên in bơtàu tơnguh pràn rlau”.

Jơnau rơcang cih Rơndap ù tiah tiah Tây Nguyên kung wèt tus broă lơh gơs ală anih tờm lơh sa tơrgùm bal, mìng dùl gah broă jat bơta ƀuơn mờ bơta pràn; Bơtàu tơnguh tiah drà mờ ală ƀòn làng bol ơm kis tiah ƀòn lơgar dipal mờ ală bơta krơi is bè ù tiah, trồ tiah, bơta niam chài mờ broă lơh sa pa. Bulah bè hơ̆, ală jơnau kờñ do gam gơtìp ală bơta kòl yan, bơta ờ ndrờm bal, ờ ring bal tài bơta gơ tàm rơndap rơndồ bơh ală gah broă dê. Pơn rơ ngan tàm hơ̆ là gơ tàm rơndap rơndồl bè rơndap ù tiah phan kuơ tàm ù, rơndap ù tiah ngui ù mờ rơndap ù tiah brê, mờ jơnau jơnau kờñ bơtàu tơnguh bơh tiah Tây Nguyên dê. Ồng Phạm Ngọc Nghị, Củ tịc Ủy ƀan Ñân zân càr Dăk Lăk đơs jơnau yal bè broă Tây Nguyên ờ gơtùi ngui bơta pràn dờng he dê bè năng lượng lơh geh wơl, geh jơnau sồr: “Sồr anih lơh broă lơh rơndap ù tiah kơlôi sơnơng, bơ tơl gah năng lượng lơh geh wơl mut tàm mat ală gah broă kuơmàng bơh tiah Tây Nguyên dê; broă lam lơh ală rơndap broă lơh năng lượng lơh geh wơl mìng geh lam lơh tŭ gàr bơta dipal mờ rơndap ù tiah, broă rơndap lơh lam lơh rơndap ù tiah ồs đèng 8. Sồr anih lơh rơndap ù tiah bơ tơl gùng dà, broă lơh hòi jà nàng ală cau bơcri priă tac tơn ồs đèng, lơh gơlik is, tac is ai âw tiah lơh sa kờñ geh uă năng lượng tàm càr in”.

Rơndap ù tiah tiah Tây Nguyên tus nam 2030, broă wèt sền tus nam 2050 kung lời ù tiah nàng gàr sùm bơta kơ̆ kơljap ală brê dà lơgar, tiah sền gàr brê bơnơm, tiah sền gàr jơi phan kis, tiah brê kah yau geh kuơ li la siñ họk uă in; sền gàr gen chi brê kuơmàng, ờ huan geh tàm ală tiah brê geh kuơ dờng màng; bơtàu tơnguh brê lơh sa; tam brê nàng drơng broă lơh phan, lơh sa suơn sre brê bơnơm pơgồp bal, phan brê bơdìh mờ dơm chi; tam sền gàr brê mpồl bơtiàn, jơi bơtià dồ êt nă cau; bơtàu tơnguh tam sền gàr brê tiah drà; bơtàu tơnguh lơh mờ măi mok lơh gơlik phan, kă bro phan brê. Rơhời ala dà cat mờ dà hơđang mat ù nàng sơlơ tơnguh bơta tơl niam ai pà dà.

Đơng lam dơ̆ pơrjum, Ƀộ trưởng Ƀộ Kế hoạc mờ Đầu tư Nguyễn Chí Dũng pà git, tus tŭ do, rơndap ù tiah tiah Tây Nguyên neh geh pơyua tus Ủy ƀan Mặt trận dà lơgar Việt Nam mờ ală Ƀộ, gah broă lơh, ală càr nàng dan jơnau đơs. Ƀộ neh dờp geh uă jơnau đơs tă pơgồp kuơmàng ngan nàng rơhời lơh sir rơndap ù tiah mờ tơnơ̆ pơrjum dơ̆ 2 kung gam kơp tai ală bơta tă pơgồp bơh ală ƀộ, gah broă lơh, ală càr mờ ală cau kơlôi sơnơng jak chài dê nàng rơndap ù tiah bơtàu tơnguh tiah Tây Nguyên ngan ngồn dipal mờ broă rơndap lơh bơtàu tơnguh bơh dà lơgar dê, ai Tây Nguyên bơtàu tơnguh tơlir mờ jŏ jòng sùm, gơ dờp mờ tam gơl nhơm trồ tiah.