Hìu bơh bi Y Chon dê, kòn cau Jeh Triêng, Kwang ătbồ Mpồl Tam klăc cau ùr xã Đăk Dục, kơnhoàl Ngọc Hồi, càr Kon Tum tàm ƀòn Đăk Răng tŭ do neh gơ gơs là tiah ơn pơdơng, ràng tơlik mờ tăc ală bơta phan lơh geh bơh sươn sre, phan sa tiơng pơnrơ bơh ƀòn lơgar dê, bè; puăc sur kòn cau ìs ro tềng hơđang bơnhă ồs, tơrnờm yăng, boh tiêu brê...Do kung là bơta pràn mờ dà kơlhề 04 nam bơ̆t bơtàu Hợp tak xã Dục Nông bơh bi Y Chon dê. 04 nam bơ̆t bơtàu hợp tak xã den geh 2 nam gơtìp kòp Kovid-19, mơya bi Y Chon bal mờ mờr 40 nă cau tàm hợp tak xã kung gam lơh gơs geh 10 phan bơna is, tăc yòm ngan tàm drà kă bro. Priă lơh geh bơh kă bro nam do neh lơh geh 1 tơmàn đong. Bi Y Chon pà gĭt: Đảng viên pal là cau lơh krơh lài bè jơh ală srơh, ală kơnòl broă. Bol añ ờ mìng tăc ală kòn sur ờ hềt lơh puăc, puăc sur halà sur kòn tai mờ bol añ gĭt lơh puăc sur hơ̆ gơ gơs phan bơna puăc sur yồng hơđang bơnhă ồs mờ bol añ neh săc rwah phan bơna do nàng tàm pơrlòng phan bơna OCOP kâp càr mờ lơh geh 3 nơm sơrmañ. Tus tŭ do, phan bơna bol añ dê geh drà kờñ ngan, kwơmàng là ală dơ̆ sa tềp den phan bơna bol añ dê ờ tơl ai drà kă bro in.

Jơnau bi Y Chon dê lơh Kwang ătbồ Mpồl Tam klăc cau ùr xã, mơkung là cau kong jơh ală bơta bòl glar lam lài tề lam làng bol tàm tiah kal ke jòi geh gùng lòt pa tàm broă lơh sa kă bro, là dùl tàm gĭt nđờ rhiang, rbô jơnau ai lơh pơnyơu bè kwang bàng, đảng viên tàm càr Kon lơh krơh lam lài, đềt mềr mờ làng bol tàm tŭ lơh jăt ală kơnòl broă mờ mpồl Đảng neh jàu. Jăt ồng A Blum, dùl nă cau geh priă tơmàn bơh kơnuh sơnơm Ngọc Linh tàm ƀòn Ngọc La, xã Măng Ri, kơnhoàl Tu Mơ Rông, pơgăp mờ do rlau jơ̆t nam den ồng mờ làng bol tàm ƀòn, tàm xã kung gam rƀah ngan sơl. Kơnờm bơh kwang bàng bơh xã tus kơnhoàl kơ̆ dơn nùs nhơm sùm ià tê sơñio broă, bơto pơlam gul tơl àr ù, bơto broă chài sih tơl gar kơnuh sơnơm, ờng kơphê tàm kơldung ù, klah ntê lơh gơlik geh nsrum ntê nha...mờ tŭ do lơh sa tam gơl loh làng. Ală broă lơh lơh pas bơh kơphê tiah mrềt, phan dà lơgar sền gàr Kơnuh sơnơm Ngọc Linh neh lơh gơrề làm gùt kơnhoàl Tu Mơ Rông. Ồng A Blum, đơs: Làng bol he jăt Đảng, Dà lơgar, iăt kơno kwang bàng bơto pơlam broă lơh sa, tam kơnuh sơnơm, tam kòi nàng geh phan sa, rài kis geh hờm ram, lơngăp lơngai chờ hờp.

Jăt ồng Dương Văn Trang, Kwang bàng Đảng Dà lơgar, Ƀí thư Tỉñ ủy càr, Củ tịc Hội đồng Ñân zân càr Kon Tum yal, ală nam do wèt tus hờ ƀòn lơgar mờ tiah jơi bơtiàn dùl êt nă cau kal ke ir, neh geh gĭt nđờ jơ̆t rbô nă kwang bàng, đảng viên geh sồr lòt tus hờ ƀòn lơgar “lơh oh mi bal”, ơm rềp mờ thôn, ƀòn “ơm bal, sa bal, lơh bal”, iăt kơno jơnau kơlôi sơnơng bơta kơ̆p kờñ, bơsong jơnau dan, jơnau lùp mờ bơta kơ̆p kờñ bơh làng bol dê. Wèt tus hờ ƀòn lơgar, lòt bal mờ ală ƀòn, xã sền gròi bơtàu tơnguh lơh sa- mpồl bơtiàn, tơnguh uă rài kis làng bol in là gùng dà ờ tŭ lơi tam gơl, geh lơh jăt sùm bơh ală rài kwang đơng lam bồ càr Kon Tum dê. Mờ tam tơngai lơh broă bơh nam 2020- 2025, kơnòl broă do geh tơnguh tai bal mờ jơnau kờñ lơh geh bơta bơtàu tơnguh kơ̆ kơl jăp ai ală thôn, ƀòn in. Ồng Dương Văn Trang, Ƀí thư Tỉñ ủy càr Kon Tum, đơs: Neh là kwang bàng đảng viên dong kờl hìu bơnhă rƀah, hìu mờr ndrờm bè hìu rƀah làng bol jơi bơtiàn dùl êt nă cau lòt tus tơn tàm sre, tàm mìr, tus tơn tàm sươn mờ lơh jăt jơnau đơs “đơs sùm kung gĭt sơl”, “ià tê sơñio broă” lơh kah wơl bồ tơngoh kơ̆p kờñ brồ guh is lik klàs rƀah bơh làng bol jơi bơtiàn dùl êt nă cau dê. Do là dùl tàm ală kơnòl broă cíñ trị kwơmàng bơh tơl nă kwang bàng, đảng viên tàm ƀòn lơgar mờ tiah làng bol ơm kis geh gal làng bol jơi bơtiàn dùl êt nă cau ơm kis.

Bơh bơta tơrgùm bal pràn, dùl nùs dùl tồr bal bơh Đảng mờ Làng bol dê, càr Kon Tum neh lơh sir gờñ jơnau kờñ jơh ală xã geh gùng rơndeh lòt tus anih; cồng nha bơto bơtê geh tơnguh uă; hìu sơnơm ală xã ndrờm geh ƀak sĩ. Khà hìu bơnhă rƀah bơh rlau 65% tơngai crơng gơs wơl càr nam 1991, gơmù tus gam hơđơm 11% tàm lồi nam 2022. Bal mờ hơ̆ là bơ̆t bơtàu geh ală anih lơh broă cíñ trị pràn kơldang kơ̆ kơl jăp mờ 14 Đảng ƀộ gơ wèt bal, 668 mpồl đảng bal mờ rlau 31 rbô 300 nă đảng viên. Ring bal đah gùng dà mờ broă lơh ngan ngồn tàm rài kis, Đảng ƀộ càr Kon Tum pơn jăt tai lơh kơ̆ kơl jăp nùs nhơm pin dờn mờ Đảng bơh làng bol ală jơi bơtiàn tàm càr dê. Bal mờ hơ̆, nùs nhơm pin dờn jơh nùs jơh tồr kung gam lơh gơlik gơs bơta gơn kơnờm mờ bơta khin cha ai jơh gùt đảng ƀộ in, lơh jăt ală broă lơh dờng, ngui niam ală bơta pràn bơh càr dê nàng bơtàu tơnguh kơ̆ kơl jăp jŏ jòng.