Nam do, mờ gơnoar là Củ tịc Ủy ƀan mpồl ASEAN atbồ rềs àr bơh trồ tiah, lơgar Việt Nam lơh ngan tơlik gơnoar tề lam tàm mpồl ASEAN ờ mìng tàm ală gah broă lơngăp lơngai, lơh sa mờ gam tơlik tàm gah broă niam chài mpồl bơtiàn, mờ tàm do là gàr bơta lơngăp lơngai ai mpồl bơtiàn in tềng đăp mờ rềs àr bơh trồ tiah. Mpồl ASEAN là tiah ƀuơn gơtìp aniai tềng đăp mờ ală bơta rềs àr bơh trồ tiah bè mìu càl dờng, dà tih dà cò, trồ prang, tơrluh ù mờ bơnơm ồs bruh,...

Ală broă lơh ngan tàm broă lơh bal mpồl ASEAN bè atbồ rềs àr bơh trồ tiah neh pơgồp bal tàm broă lơh gơguh bơta pràn tam dră jai ơ̆t mờ lơh gơmù bơta rềs àr bơh trồ tiah ai ală lơgar tàm mpồl in; mờ nùs nhơm tam klăc bal, ală lơgar tàm mpồl ASEAN kung neh hơ lơh jăt nùs nhơm kơlôi sơnơng mpồl ASEAN nàng gơs tiah lam bồ gùt plai ù bè atbồ rềs àr bơh trồ tiah bơh broă cri bơyai bal, tam pà bal jơnau git wă mờ broă mờng chài mùl màl, kung bè pơgồp bal tàm ală broă lơh ngan gùt plai ù bè rơcang sơndră mờ rềs àr bơh trồ tiah.