Tàm dơ̆ pơrjum do rơ̆p cribơyai, sền swì mờ wèt tus yal jơh kòp Kovid-19 tàm lơgar Việt Nam. Lài hơ̆, pa do, Thủ tướng Cíñ phủ lơgar Việt Nam ồng Phạm Minh Chính sồr Ƀộ Y tế rơcăng sră nggal tam gơl kòp Kovid-19 bơh kòp lơh bơtờp mpồl A tus mpồl B (hơ̆ là bơh mpồl sơbơng roh ngan digơlan lơh bơtờp uă, lơh bơtờp làm bă tiah, khà chơ̆t să uă tus mpồl kòp lơh bơtờp sơbơng roh digơlan lơh bơtờp mhar, digơlan lơh chơ̆t să) mờ wèt tus yal jơh kòp tàm lơgar Việt Nam.

Bơh mờng chài tàm broă geh ngan, sơrlèt gan ală dơ̆ tam dră mờ kòp, ală kwang bàng Quôk hội gah lơh sơnơm đơs là: Việt Nam gơtùi iang nùs yal jơh kòp Kovid-19 tài bơh neh tơl ală bơta. Việt Nam neh geh tơl 3 bơta tờm ngan, kờñ ngan nàng gơtùi iang nùs yal jơh kòp Kovid-19. Hơ̆ là khà kòp kơn jơ̆ tài bơh kòp Kovid-19 lơh gơbàn ndrờm bè ờ gam tai. Ală cau chơ̆t mìng là tài bơh cau kòp neh geh lài kòp tàm să kơn jơ̆ geh bơtờp mờ kòp Kovid-9, pà gŏ kung gam lơh bơtờp sơl tàm mpồl bơtiàn mơya ờ gam sơbơng roh tai, lơh gơbàn chơ̆t să uă. Bal mờ hơ̆, Việt Nam geh khà cĭt tơl vaccine uă ngan. Neh geh 266 tơlak ding cĭt ai cau rlau 12 sơnam in mờ 2 ding pal geh, ding dơ̆ 4 neh geh cĭt ai cau bơh rlau 18 sơnam geh pơhìn uă in. Bơdìh hơ̆ tai, bơta kòp Kovid-19 tàm dunia neh ờ huan lơh bơtờp tai. Bồ nhai 05 nam 2023, Mpồl Lơh sơnơm Dunia- WHO yal bơr, kòp Kovid-19 ờ gam tai là jơnau jal mhar gùt plai ù.