Jăt broă rơndăp lơh neh geh kĭ, anih biến áp 110kV Lăk geh lơh tàm xã Dăk Liêng, kơnhoàl Lăk, càr Dăk Lăk. Broă lơh do geh Tổng kông ty điện lựk miền Trung lơh tờm bơcri priă, bơta dờng lơh geh 2 gùng che ồs đèng 110kV mờ jòng mờr 50 kơi sồ, 1 anih biến áp geh bơta pràn 50 MVA.

Kờp jơh priă lơh là rơlao 180 tơmàn đong. Bal mờ rơndăp broă lơh do, Điện lựk Dăk Lăk kung lơh gơs gùng che ồs đèng trung áp 35kV mờ 22kV tơrbŏ bal tơnơ̆ mờ Anih biến áp 110kV Lăk nàng geh sùm uă ngan cồng nha broă lơh. Rơndăp broă lơh tơnơ̆ mờ tŭ geh lơh gơs geh ai ngui tàm nam 2024, geh tơnguh broă ai ồs đèng kơnhoàl Lăk in, sơndră mờ bơta uă ir ai anih biến áp 110kV Krông Bông dê.