Bal mờ kwang đơng lam bồ ală ƀộ, gah lơh broă dà lơgar bal mờ 2 càr Dăk Lăk mờ Khánh Hoà, gal làng bol kis tàm xã tiah ngài Cư̆ Drăm, kơnhoàl Krông Bông mờ xã Cư̆ San, kơnhoàl Mdrăk, càr Dăk Lăk kung neh tus sền dơ̆ sơn đờm mŭt lơh gùng kwơ màng do sơl. Bi Trần Hữu Thới, kis tàm xã Cư̆ Drăm, kơnhoàl Krông Bông, càr Dăk Lăk tơlik nùs nhơm chờ mờ đơs: “Añ gŏ gơlơh chờ hờp ngan. Broă lơh gùng do pal đơs ngan là gùng tờm ngan. Bơta tai là tơmù ờ uă ngan tơngai mhar ngan, mờ di gơlan tus do geh tơnguh bơtàu lơh sa pràn ngan”.

Rơndăp broă bơcri priă lơh gùng rơndeh ntoăt mhar Khánh Hoà – Buôn Ma Thuột geh tiah sơnrờp tàm tiah tìp bal đah gùng 26 mờ gùng sồ 1, tiah đah jum Vân Phong, thị xã Ninh Hoà, càr Khánh Hoà; tiah lồi tàm tơrbŏ bal mờ gùng Hồ Chí Minh gơl gùng pleh hờ đah măt tơngai lik ƀòn dờng Buôn Ma Thuột, càr Dăk Lăk. Kờp jơh bơta jòng 118 kơi sồ, priă tă lơh rơlao 21 rơbô 900 tơmàn đong. Tàm hơ̆ càr Khánh Hoà lơh tờm bơcri priă lơh 32 kơi sồ, priă tă 5 rơbô 632 tơmàn đong; Ƀộ Giao thông Vận tải lơh tờm bơcri priă lơh 37, 5 kơi sồ, priă tă lơh 9 rơbô 818 tơmàn đong, priă gam tai là càr Dăk Lăk lơh tờm bơcri priă. Tơngai lơh jăt rơndăp broă lơh gùng do kờp dŭ bơh nhai 6 nam 2023 tus nam 2030 geh lơh gùng ndrờm bal mờ ai ngui.

Ồng Phạm Ngọc Nghị, Củ tịc UɃÑZ càr Dăk Lăk pà git, càr neh tơrgùm đơng lam mơ bơh tŭ rơndăp broă lơh gùng do geh kĭ mờ sơn đờm tơm ntrờn ù tiah, mờ ai geh gùng dà broă lơh ngan cíñ trị bơh càr dê. “Bè kơnòl broă bơh càr Dăk Lăk dê, càr Dăk Lăk hơ mờ Thủ tướng Cíñ phủ geh pơn jăt tai tơrgùm đơng lam, lam sồr Mpồl atbồ rơndăp broă lơh do, bal mờ ală anih lơh broă, mpồl lơh broă, ală kơnhoàl lơh pràn broă tơm ntrờn ù tiah bơnah gam tai, jào 100% bă ù mờ ală bơta geh kwơ ai mpồl lơh gùng do in lài mờ ngai 31 nhai 12 nam 2023; ai tơl bơta ƀuơn ngan nàng ală npồl lơh gùng, pơlam, lơh jăt rơndăp broă lơh geh di mờ tơngai geh ai, kơl jăp”.

Tŭ lơh gơs, gơl gùng rơndeh ntoăt mhar Khánh Hoà mờ Buôn Ma Thuột tơngai sơnrờp geh pơgồp bal tàm broă lơh geh gơl gùng tơrbŏ bal tiah Tây Nguyên mờ tiah Jăt gah dà lềng đah jum tàm gùl lơgar, tơrbŏ tiah jăt gah (gùng rơndeh ntoăt mhar đah tô đah jum hờ đah măt tơngai lik, gùng Hồ Chí Minh, gùng sồ 01, gùng jăt gah dà lềng), tơnguh cồng nha ală rơndăp broă lơh gùng neh mờ gam geh bơcri priă, di pal mờ jơnau kờñ pơn diang phan, ai geh tiah, bơta pràn tơnguh bơtàu. Broă lơh gùng do kung pơgồp bal tàm broă tơnguh uă bơta pràn tàm pơrlòng, bơta pràn pơgồp bal, lơh pràn broă lơh bal mờ tơnguh bơtàu tiah, pơgồp bal tàm broă sền gàr bơta lơngăp lơngai, sền gàr dà lơgar, tơn jơh jơgloh tơmù rơƀah, rơhời lơh jăt geh cồng nha ală jơnau kờñ, broă lơh jŏ jòng tàm broă tơnguh bơtàu lơh sa mpồl bơtiàn di jăt mờ Nghị quyết Pơrjum dờng dơ̆ XIII bơh Đảng dê. Gơwèt mờ làng bol kis tàm ală tiah ngài càr Dăk Lăk mờ tiah kơh bơnơm hờ đah jum măt tơngai mŭt càr Khánh Hoà, rơndăp broă lơh gùng rơndeh ntoăt mhar Buôn Ma Thuột mờ càr Khánh Hoà là broă lơh kwơ màng ngan, là broă sền gròi uă ngan bơh Đảng, Cíñ phủ dê, sơrlèt bơdìh mờ jơnau kơ̆p kờñ bơh làng bol dê.

Bal mờ gùng rơndeh ntoăt mhar Khánh Hoà – Buôn Ma Thuột geh lơh, di tàm dơ̆ do gam geh 2 rơndăp broă lơh kwơ màng ndai kung geh mŭt lơh sơl, hơ̆ là gùng rơndeh ntoăt mhar Biên Hoà – Vũng Tàu mờ Rơndăp broă lơh gùng Jăt gah 3, ƀòn dờng Hồ Chí Minh. Do là 3 Rơndăp broă lơh gùng kwơ màng dà lơgar gah gùng lòt dê mờ kờp jơh bơta jòng bơh 3 gơl gùng là 247 kơi sồ; kờp jơh khà priă bơcri bơh 3 Rơndăp broă lơh gùng do rơlao 115 rơbô tơmàn đong.

Đơs tàm pơrjum, ala măt Kwang đơng lam Cíñ phủ, Thủ tướng ồng Phạm Minh Chính đơs tờm, Pơrjum dờng Đảng gùt lơgar dơ̆ XIII neh pơn jăt tai ai broă bơ̆t bơtàu phan bơna ndrờm bal là dùl tàm pe broă lơh pràn jŏ jòng, tàm hơ̆ ai lài broă tơnguh bơtàu ờ uă broă lơh kwơ màng dà lơgar dê bè gùng lòt. Thủ tướng đơs loh, bơta kwơ màng bơh 3 rơndăp broă lơh do: “Bơta kwơ màng bơh 3 rơndăp broă mŭt lơh ngai do là ală rơndăp broă ndrờm geh ngui kơrnoăt krơi is geh bè broă lơh pràn broă tam pà kấp tam pà gơnoar, jăt mờ hơ̆ jào càr, ƀòn dờng lơh anih tờm lơh jăt rơndăp boă lơh; ngui kơrnoăt hòi jà bơta pràn ai broă lơh rơndăp broă in pơgồp bal đah kes priă Dà lơgar mờ ală càr, ƀòn dờng; ngui broă hòi jà cau lơh nàng rơwah ai cau lơh rơndăp boă in, bơh tŭ hơ̆ tơmù ờ uă ngan tơngai rơcang nàng lơh rơndăp broă lơh. 3 kơrnoăt do ndrờm neh tơnguh uă ngan bơta gơrềng bal, ai tơngŏ bơta di pal bơh Đảng, Dà lơgar tàm broă ai geh kơrnoăt pa nàng lơh gơs jơnau kờñ tơnguh bơtàu ndrờm bal broă lơh phan bơna gùng lòt jăt Nghị quyết bơh Đảng dê”.

Mùl màl neh ai gŏ, gùng lòt pơn diang phan đơs bal mờ gùng rơndeh ntoăt mhar, ƀlàng rơndeh par, anih ơhò ơm đơs is cèng geh cồng nha loh làng bè broă tơnguh bơtàu lơh sa mpồl bơtiàn. Gùng lòt tơnguh bơtàu tus tàm tiah lơi geh pờ bơta pràn tơnguh bơtàu pa bè lơh sa mpồl bơtiàn tàm tiah hơ̆, uă tiah drà, tiah lơh sa mờ măi mŏk, broă lơh drơng ala, lòt nhơl geh lơh, khà ù ai lơh geh cồng nha.