Bồ nam 2017, gơl gùng pleh hờ đah Jum ƀòn dờng Bảo Lộc, càr Lâm Đồng sơn đờm lơh, làng bol tàm tiah do chờ hờp ngan. Tŭ gùng do geh lơh ờ mìng lơh gơmù kòl gùng tàm gơl gùng 20 gơl lòt gan ƀòn dờng Bảo Lộc, mờ gam ai geh bơta niam tàm broă bơtàu tơnguh lơh sa mờ rài kis làng bol tàm tiah do.

Ồng Phạm Minh Thuận, kis tàm sơnah ƀòn Lộc Sơn, ƀòn dờng Bảo Lộc pà git, làng bol kis tàm do kơ̆p gơn sùm kờñ geh lòt tàm gùng pa, mơya kung ờ git bè lơi gùng gam lơh den pal ơm ing jơh. Broă ơm ing nggùl gơl bè do neh lơh uă broă lơh tàm gơl gùng do ờ niam, gùng gơtìp tơrlah… lơh hoàc huơr priă Dà lơgar uă ngan. Ồng Phạm Minh Thuận pà git: “Gùng do là gùng tờm ngan bơh tiah tàm gùl ƀòn dờng Bảo Lộc dê. Làng bol kis tàm do neh bơh jŏ ngan, bơh nam 1954 tus tŭ do, tŭ gùng tàm do geh lơh den broă bơtàu tơnguh ƀòn dờng dê kung geh bal sơl. Kung kơ̆p kờñ gơnoar atbồ tàm do geh jơnau đơs mờ Quốk hội nàng geh lơh gơs gơl gùng do, tàm gùl ƀòn dờng mờ lời gùng lơh nggùl gơl bè do là hoàc huơr ngan”.

Broă ơm ing lơh gùng, ală broă lơh ờ hềt ndrờm bal gam là bơta tờm lơh gơtìp uă dơ̆ rềs àr tàm gơl gùng do. Nhai 03 nam 2023, dùl nă cau klao 54 sơnam măi rơndeh ôtô pơn diang bal sao 4 sơnam, tŭ lòt tus tềng dùl nơm rơƀàng ờ hềt geh rang đa tàm gơl gùng pleh, gơl lòt gan xã Lộc Nga, ƀòn dờng Bảo Lộc den gơtìp gơdùh tàm thòng lơh 2 nă ồng mờ sao gơtìp chơ̆t. Pơn jăt mờ hơ̆, tàm lồi nam 2023, dùl nă klao pơnu kung gơtìp chơ̆t tŭ măi rơndeh Honda gơdùh tàm bơtô tơrlah tàm gùng pleh do. Jăt ồng Hoàng Xuân Hậu, kis tàm thôn 3, xã Đại Lào, ƀòn dờng Bảo Lộc yal, bŭ lah gơnoar atbồ tàm do neh tồt jơnau cih yal mơya bơta ngòt rơngơ̆t sùm gơtìp, tàm hơ̆ uă ngan là ală cau bơh tiah ndai lòt tus.

Ồng Hoàng Xuân Hậu pà git: “Làng bol lòt rê uă mờ gùng ờ niam tơrlah uă. Di lah lòt bơh đah do tus den ờ sền gŏ, hơ̆ là kung sền gŏ đah ne mơya jàng lah gùng gam bè ờs, mùl màl neh gơtìp tơrlah jrô bơh 3 tus 4 thơ̆k, mờ trồ mìu là jơngo ngan tơn. Gŏ cau bơh tiah ndai là bol añ pal lam gùng cau in, rơndeh ôtô tus tềng tiah hơ̆ là pal rê wơl nàng pleh mờ bơta ngòt rơngơ̆t. Kơ̆p kờñ Cíñ phủ, kấp geh gơnoar sền gròi tus mờ gơl gùng do”.

Jăt ồng Trần Đình Văn, Phó Ƀí thư Duh broă sùm Tỉñ ủy, Kwang lam bồ mpồl Kwang bàng Quốk hội càr Lâm Đồng đơs, broă lơh nggùl gơl hơ̆ sồng lời tơn tàm uă nam do neh lơh gơl gùng pleh đah Jum ƀòn dờng Bảo Lộc tơrlah uă ngan, lơh hoàc huơr priă mờ gơtìp bal uă bơta ờ niam neh geh cau tĕ khà uă dơ̆ đơs tus. Mpồl kwang bàng Quốk hội càr Lâm Đồng kung neh dan mờ Cíñ phủ neh ring bal geh pơn jat tai tă 320 tơmàn đong nàng lơh gơs gơl gùng do tàm tơngai tus.

Ồng Trần Đình Văn đơs: “Gơl gùng pleh ƀòn dờng Bảo Lộc do geh Mpồl Kwang bàng Quôk hội kung neh dan uă dơ̆ ngan sơl. Gơl gùng do neh geh tŭ gơtìp ală dơ̆ rềs àr tàm gùng lơh chơ̆t cau, hơ̆ sồng broă lòt rê gơtìp kal ke, ƀơ̆ tàm tiah kis tàm do tai… pa do, Phó Thủ tướng ồng Lê Minh Khái kung neh geh jơnau đơs sơl bè bơta do. Mùl màl, geh tam pà rơlao 320 tơmàn đong bơh priă bơcri dà lơgar dê nàng lơh gơs gơl gùng pleh ƀòn dờng Bảo Lộc in”.

Broă lơh gơl gùng pleh đah Jum ƀòn dờng Bảo Lộc là broă lơh bơtơl tàm rơndăp broă lơh wơl, lơh niam gùng 20 lòt gan bàr càr Đồng Nai mờ Lâm Đồng dê jăt broă lơh BT (lơh-tam jào). Broă lơh do geh Ƀộ Gùng lòt mờ Pơn diang phan là mpồl ai bơcri priă lơh mờ Kông ty Kổ phần BT20 – Cửu Long lơh tờm bơcri priă lơh. Broă lơh gùng do jòng 15 kơi sồ mờ priă bơcri priă geh lơh wơl là rơlao 720 tơmàn đong. Lồi nam 2020, tàm tŭ lơh geh 70% khà broă lơh neh pal ơm ing lơh bơh tŭ hơ̆ tus tŭ do tài ờ tơl priă.