Tàm bă brê 251, xã Ea Bung, kơnhoàl Ea Súp, ơm rềp kềng tơn Gùng rơndeh dờng 14C, rềp nhàr bal mờ Brê dà lơgar Yok Đôn, uă chi brê geh tờm dờng bơh 10 tus 40 phơng, jơnhoa bơh 3 tus 4 thơk neh gơtìp gơ pừ gơplok jơh bal mờ nggu rơyas, ơn tơrgùm wơl bal gơ gơs ală gơnru. Tàm bă brê gơtìp mus kơl, gĭt nđờ jơ̆t lồ neh geh tam tờm chi keo pa tàm bơrlŭ bal mờ tơngời. Ồng Nguyễn Thanh Hồng ơm tàm xã Ea Bung, kơnhoàl Ea Súp, càr Dăk Lăk, ồng là cau lơh bal lơh rơndăp broă lơh pà gĭt, brê gơtìp mus kơl tàm bă brê dềt 251, bơh mò Trịnh Thị Hương dê tŭ do là Kwang ătbồ Kông ty Tam brê ngai 27/7 ătbồ. Kờp jơh bă brê gơtìp mus kơl là pơgăp 100 lồ. Ồng Nguyễn Thanh Hồng, đơs: Nhai 7 nam 2021 mò Hương ai cau mờ măy mok tus cò wàs jơh 40 lồ brê, hơ̆ sồng tus tàm nhai 5 nam 2022 den mò wàs tai pơgăp 60 lồ tai. Kờp jơh mus kơl 2 nam pa do là 100 lồ rao. Pa do, mpồl lòt sền làm gah geh tus sền sơl mơya kung ờ hềt gŏ jơnau hơ wơl ai ală cau tàm mpồl bơh kông ty bol añ dê in.

            Rơndăp broă lơh lơh tam gơl wơl, sền gàr mờ bơtàu tơnguh brê geh Ủy ƀan Ñân zân càr Dăk Lăk ai gơnoar lơh ai Kông ty Trăč ñiệm Hữu hạn tam brê ngai 27 nhai 7 in lơh bơh kơrnoăt sồ 2959, tàm nhai 11 nam 2010. Kờp jơh bă ù brê lơh jăt rơndăp broă lơh là 783 lồ 4 sàu, tàm bă brê dềt 251, xã Ea Bung, kơnhoàl Ea Súp. Jơnau kờñ bơh rơndăp broă lơh dê là tam brê mờ lơh sa sươn sre brê bơnơm pơgồp bal. Cau ala măt jăt adat boh lam mờ lơh kwang ătbồ kông ty bơh chờm là ồng Nguyễn Văn Quê, ơm tàm càr Tây Ninh mờ tus nam 2017 den tam gơl, tăc wơl mờ mò Trịnh Thị Hương in ơm tàm càr Đồng Nai. Jăt ồng Nguyễn Ngọc Luật, Phó Củ tịc Ủy ƀan Ñân zân xã Ea Bung yal, tơngai lài, anih lơh broă geh gơnoar kung geh dờp sơl jơnau yal bơh làng bol mờ bàr pe nă cau tàm Kông ty Trăč ñiệm Hữu hạn tam brê ngai 27 nhai 07 dê lơh jăt rơndăp broă lơh geh uă broă lơh tìs. Xã neh pơgồp bal mờ Hạt Kiểm lâm kơnhoàl Ea Súp bal mờ bàr pe cơldŭ ƀan lơh broă ờs mờng bơh kơnhoàl dê lơh dùl mpồl lòt sền. Bơh lòt sền, mpồl neh gŏ broă ătbồ sền gàr brê, tam brê, lơh sa sươn sre brê bơnơm pơgồp bal bơh mpồl lơh sa kă bro do dê ờ hềt lơh jăt di gùng dà broă lơh geh Ủy ƀan Ñân zân càr Dăk Lăk kĭ. Kwơmàng neh geh rlau 326 tàm 783 lồ brê gơtìp roh uă ngan chi brê; tam gĭt nđờ jơ̆t lồ brê tàm njềt tàm sơgràm tàm bă ù brê geh is; cih jơnau yal bơta geh ngan brê ờ dipal mờ jơnau yal bơta gơbàn ngan ngồn brê bơh Hạt Kiểm lâm kơnhoàl Ea Súp dê. Ồng Nguyễn Ngọc Luật, Phó Củ tịc Ủy ƀan Ñân zân xã Ea Bung, kơnhoàl Ea Súp, pà gĭt: Lồi nhai 9 pa do, xã geh pơgồp bal mờ Hạt Kiểm lâm kơnhoàl Ea Súp tus sền swì. Bơh lòt sền, bă brê gơtìp cò pơnring gơ ơm tàm rơndăp ù tiah tam brê jŏ jòng mờ mpồl lơh sa kă bro khi neh tam mờr 62 lồ tờm chi keo pa tàm bă brê hơ̆. Jăt gơnoar broă kơnòl broă, khi ờ gŏ rơgơi geh gơnoar tam brê tàm hơ̆. Tơngai tus, xã geh pơn jăt tai dan mờ ală anih lơh broă geh gơnoar geh broă lơh ờs mờng mờ gơnăp gơnoar nàng bơsong broă do.

            Ồng Nguyễn Như Hoàng, Kwang ătbồ Hạt Kiểm lâm kơnhoàl Ea Súp yal, tàm rơndăp broă lơh lơh tam gơl wơl, sền gàr mờ tam brê bơh Kông ty Trăč ñiệm Hữu hạn tam brê ngai 27 nhai 7 dê tàm xã Ea Bung, ờ mìng tìs bè broă ătbồ sền gàr brê, cò pơnring, bơ̆t bơtàu phan bơna, mus kơl brê kơñau tam chi lơh sa sươn sre, mờ gam lơh tìs bal gơrềng tus tăc bro ù brê. Ală broă lơh tìs do là kơn jơ̆ ngan, mơya kơnòl lơh glài den gơwèt wơl mờ kâp hơđang den tàng Hạt Kiểm lâm kơnhoàl neh lơh sră dan nàng bơsong ală cau geh gơrềng. Ồng Nguyễn Như Hoàng, đơs: Hạt Kiểm lâm kơnhoàl neh dan mờ Ci kụk Kiểm lâm càr Dăk Lăk sồr Kông ty Trăč ñiệm Hữu hạn tam brê ngai 27 nhai 07 pal yal lơh loh mờ lơh loh làng jơnau bơh tài bè lơi mờ brê gơtìp mus kơl uă chi che mờ gơ hoăc rlau 326 lồ brê mờ broă ờ gŏ ătbồ sền gàr brê; tus lùp sền tơl làm rơndăp broă lơh nàng lơh loh làng gơnoar broă, kơnòl bơh Mpồl ătbồ lài do mờ mpồl ătbồ pa kung bè ală cau dùl nă să geh gơrềng tus broă do. Dan mờ Ủy ƀan Ñân zân kơnhoàl sồr Kwang àng kơnhoàl Ea Súp dờp sră nggal dơ̆ broă do nàng lơh glài kràñ jăt jơnau cih bơh adat boh lam dê.

            Tàm kơnhoàl Ea Súp, càr Dăk Lăk geh 26 rơndăp broă lơh jàu brê, ai apah brê, lơh tơrlòng lài lơh broă sa sươn sre brê bơnơm pơgồp bal, kờp jơh bă brê mờr 20 rbô lồ. Mơya, bơh rlau 10 nam lam lơh jăt, uă rơndăp broă lơh ờ lơh geh cồng nha, lời gơguh tai jơnau mus kơl brê, sơgràm ù brê. Tàm hơ̆ geh bal broă tăc bro wơl rơndăp broă lơh, mus kơl jơh chi che tàm brê nàng ai ù tam tờm phan sa, tờm chi jŏ nam mờ geh tŭ là tam pà bă mờ tăc ù.