Tŭ do, jơh ală ƀộ, gah lơh broă dà lơgar, ală càr, ƀòn dờng neh lơh jăt broă lơh dùl mpồng, dùl mpồng pơgồp bal, ngui kông nghệ thông ti tàm broă dờp, bơsong sră nggal; khà bơsong sră nggal lài mờ tơngai mờ di tơngai geh bơh 95% rơlao hờ đang.

Pơgăp mờ do 1 nhai, mò Phạm Thị Lệ, kis tàm xã Lương Phi, kơnhoàl Tri Tôn, càr An Giang tus tàm Anih dờp mờ jào wơl cồng nha lơh sră nggal tàm kơnhoàl nàng lơh sră dờp gơnoar ngui ù. Jăt mờ kơrnoăt geh ai, tơnơ̆ mờ 1 nhai hơ̆ sồng geh sră ngui ù. Mơya mìng tơnơ̆ 20 ngai, mò neh dờp jơnau yal sră lơh neh geh cồng nha: “Neh was ù, hơ̆ sồng geh sră pơrgon do. Tềng anih lơh broă sồ 02, hơ̆ sồng sồ 05, cau ai he in. Cau sồr he tus tềng sồ 05 lòt kờp priă hơ̆ sồng jào tềng sồ 02. Ală cau lơh broă, bơto sồr he kung lơh mhar ngan sơl”.

Làng bol tus lơh sră nggal tàm Bơnah dùl mpồng kơnhoàl Tri Tôn mìng ai sồ jăt tơl gah broă neh geh tam pà lài, tơnơ̆ mờ hơ̆ jào sră dùl mpồng pơgồp bal, dờp geh sră pơrgon mờ tus ngai geh yal nàng làng bol in tus dờp cồng nha lơh sră. Tàm do gam geh phan lùp nàng git, ai điểm kwang bàng lơh broă nàng làng bol gơtùi sền nùs nhơm bơh kông cứk, viên cứk lơh broă. Ha là làng bol kung gơtùi jào is sră điện tử mờ phan lơh broă neh geh lài. Ồng Đỗ Minh Trí, Phó Củ tịc UɃÑZ kơnhoàl Tri Tôn pà git: “Kông cứk dùl mpồng git geh kơnòl uă mờ làng bol, mờ nùs nhơm drơng làng bol, bơh tŭ hơ̆ kơnòl lơh broă dùl mpồng pơgồp bal tàm xã, kơnhoàl niam ngan, ờ gam gơtìp kal ke tai. Tŭ do kơnhoàl, geh bal xã bơsong 5 broă lơh tềng tiah hơ̆ tơn. Gơwèt mờ làng bol kis tàm kơnhoàl Tri Tôn loh làng, ndrờm bal ală tơngu me làng bol tus lơh sră nggal kờñ bơta lơi. Di lah làng bol yal kwang bàng lơi lơh kal ke den yal jơnau tàm dùl mpồng tàm hơ̆ tơn”.

Gam tàm Anih tờm Drơng broă lơh sră nggal dà lơgar càr Dăk Lăk, do là anih dờp, bơsong mờ jào cồng nha bơsong sră nggal bơh 20 sở, gah lơh broă tàm càr dê, tàm hơ̆ geh 2 anih lơh broă bơh đang mù hờ đơm là Dà lơgar mờ Kwang àng càr mờ Ƀảo hiểm xã hội càr; jơh ală sră nggal geh dờp, jào cồng nha tàm Anih do ndrờm geh lơh jăt bơh anih lơh broă yal tơngit dùl mpồng điện tử càr dê mờ phần mềm gah broă do. Bi Lương Trung Thành, tus bơh kơnhoàl Ea H’ Leo pà git: mìng roh tàm 5 phút mờ ală broă lơh ƀuơn ngan, bi neh lơh gơs ală sră nggal kờñ lơh nàng dan tam gơl pa sră măi rơndeh mờ kơ̆p dờp cồng nha bơh Bưu điện jun tus: “Lài do pah dơ̆ lòt lơh sră nggal pal lòt pơdar sùm uă dơ̆, mơya tŭ do mìng tus tàm dùl tơngai ờ jŏ neh lơh gơs. Gŏ mhar, niam, ƀuơn tus mờ làng bol lòt rê”.

Nàng tơnguh uă bơta niam bơsong sră nggal, tŭ do, ală anih lơh broă, mpồl lơh broă geh sră nggal dờp mờ jào cồng nha bơsong sră nggal tàm Anih tờm Drơng broă lơh sră nggal dà lơgar càr Dăk Lăk gam lơh pràn broă bơsong sră nggal jăt broă lơh “ờ kơ̆p” gơwèt mờ ală sră nggal geh tơngai bơsong ờ jŏ ngai, ƀuơn lơh, broă bơsong sră nggal ờ gơrềng tus uă anih lơh broă, mpồl lơh broă.

Đơs bè cồng nha bơh broă lơh dùl mpồng pơgồp bal, dùl mpồng điện tử tàm broă bơsong sră nggal, Phó Giáo sư, Tiến sĩ Ngô Thành Can, Phó kwang atbồ Mpồl drơng broă lơh sră nggal lài do, Hìu bơsram Hàñ cíñ Dà lơgar đơs là, broă lơh jăt, lơh jăt kơrnoăt geh ai dùl mpồng, dùl mpồng pơgồp bal neh pơgồp bal tàm broă tơmù ală sră nggal uă ir, bơrlŭ bal. Mpồl kwang bàng lơh broă sră nggal đơs bal, kwang bàng ai broă lơh drơng ala sră nggal dà lơgar đơs is geh tơmù, ờ gal. Mờ bơta kwơ màng ngan là cèng wơl bơta di nùs ai làng bol in: “Pơgồp bal dùl mpồng sră nggal mờ điện tử nàng ai tơl bơta niam ală cau, mpồl lơh broă in, tơmù tơngai lơh jăt broă lơh bè sră nggal. Bơdìh mờ broă lơh mhar, tơmù tơngai lơh broă den broă tềm pềr tài he neh tơmù khà kwang bàng dùl mpồng lơh broă, tơmù priă tă ngui sră pơ-àr, tơmù tơngai ơm kơ̆p, lơh jăt broă lơh mờ tềm pềr, ală priă tă ndai. Cèng geh nùs nhơm pin dờn bơh làng bol”.

Tŭ do, jơh ală càr, ƀòn dờng kung neh tơlik geh Broă rơndăp lơh jăt rơndăp broă “Tam gơl pa broă lơh jăt kơrnoăt “dùl mpồng”, “dùl mpồng pơgồp bal” tàm broă bơsong sră nggal”, mờ jơnau kờñ tus nam 2025, lơh sồ jơh ală sră nggal, cồng nha bơsong sră nggal tàm jơh ală gah lơh broă “dùl mpồng” tàm ală sở, gah lơh broă, bal mờ ală mpồl lơh broă sră nggal kấp kơnhoàl, xã in.