Hìu bơnhă mò Lê Thị Phi Yến ơm tàm tổ zân phố 7, thị trấn Krông Kmar, kơnhoàl Krông Bông 2, 3 nam lài kung gam gơ wèt hìu bơnhă rƀah. Nam 2019, tŭ kòn klau Lê Đăng Khoa lòt lơh broă tàm lơgar Nhờk. Rài kis hìu bơnhă mò dê neh tam gơl. Mò Yến pà git, pah nhai, tơnơ̆ tŭ kờp jơh ală bơnah priă, bi Khoa ndrờm pơyua rê hìu bơnhă in rlau 20 tơlak đông. Kơnờm bơh hơ̆, mìng tơnơ̆ 1 nam, bơh bơnah priă mờ kòn klau pơyua, mò Yến neh tơm jơh priă dồs càn lài hơ̆, mờ kung geh priă nàng lơh wàng ròng iar, sur mờ tờ tơnau dờng ka nàng bơtàu tơnguh lơh sa: “Kòñ añ dê lòt lơh broă tơnơ̆ 3 nam ơm tàm lơgar Nhờk rài kis kung neh kơ̆ kơljap, kung geh priă pơyua mè bèp in nàng lơh hìu đam, rlau mờ hơ̆ tai khai kung sền gŏ rài kis gơguh jak pa den khai kung git lơh broă niam mpồl bơtiàn in den añ chờ hờp ngan. Đơs bal tàm do kung geh uă cau ờ mìng hìu bơnhă añ lơm gời, pơyua priă kung uă, đơs bal là kung niam ngan”.

Hìu geh uă kòn den tàng gùt nam lơh broă glar bòl mơya rài kis hìu bơnhă ồng Y Hai Niê ơm tàm ƀòn Hluk, xã Ea Tiêu, kơnhoàl Cư Kuiñ kung gam kal ke ngan. Klo jơnau yal bè lòt lơh broă hờ lơgar ndai, hìu bơnhă ồng neh leng càn priă nàng ai kòn ùr là H’Hằng Bkrông lòt lơh broă tàm lơgar Nhờk. Mờ broă tàm gah jùt wàs hìu ơm, hìu nac, H’Hằng geh tơm 4 tơlak đông dùl ngai. Mìng tơnơ̆ 1 nam lơh broă, H’Hằng neh pơyua priă rê nàng mè bèp in tơm jơh priă càn. Tŭ do jơh bal 2 nă ùr bơklau H’Hằng ndrờm lơh broă tàm lơgar Nhờk, pah nhai pơyua priă rê nàng ròng siam mè bèp. Ồng Y Hai Niê đơs: “Kòñ añ dê lòt lơh broă hờ lơgar ndai nàng pơgồp bơnah dong rài kis hìu bơnhă ờ huan kal ke. Tŭ do neh ờ huan kal ke tai, rài kis neh tơl ngui tơl sa đau, kơp kờñ kòn lơh broă niam nàng tơnơ̆ do rơhời bơtàu tơnguh rlau”.

Jat khà kờp bơh Sở Lao động, Thương ƀiñ mờ Xã hội càr Dăk Lăk dê, tơngai bơh nam 2019 tus nhai 10 nam 2023, gùt càr geh 5 rbô 763 nă cau lòt lơh broă hờ lơgar ndai. Ală tiah, ală lơgar lòt lơh broă uă ngan là Nhờk, Đài Loan, Hàn Quôk…, mờ ală gah broă tờm ngan là kơ khí, bơt bơtàu, crăp điện tử, lơh suơn sre… Priă lơh geh kờp bal bơh cau lòt lơh broă tàm lơgar ndai là pơgap 20 tơlak đông dùl nă cau dùl nhai. Jat mò Đặng Thị Huyền Trang, Phó Kwang atbồ Phòng Lao động, Thương ƀiñ mờ Xã hội kơnhoàl Cư Kuiñ pà git, ală nam do, broă ai cau lòt lơh broă hờ lơgar ndai jat sră pơrgon geh ală kâp, ală gah broă lơh sền gròi dong kờl, mơya mùl màl khà cau lòt lơh broă hờ lơgar ndai jat sră pơrgon gam êt rlau pơn drờm mờ khà cau lơh broă càr dê. Bơta chài lơh broă, bơta chài đơs dà lơgar ndai, mờng kwèng niam chài lơh broă mờ măi mok ờ huan geh. Den tàng, nàng cau lòt lơh broă hờ lơgar ndai geh bơta niam den broă mblàng yal, sac rơ wah mờ ai tơlikl lài jơnau pơlam jòi broă lơh kung bè rơ wah lơgar lòt lơh broă là bơta pal geh: “Tàm tơngai tus, Phòng Lao động, Thương ƀiñ mờ Xã hội sơlơ tơnguh rlau tai broă lơh mblàng yal, bơto pơlam tơl làm ală gùng dà, broă lơh, bơta dong kờl bơh Đảng mờ dà lơgar dê kung bè bơh càr dê bè ală broă lơh ai cau lòt lơh broă hờ lơgar ndai, dong làng bol tơnguh jơnau git wă, git loh jơnau tơnggit bè drà lơh broă, pơn jat tai sơlơ tơnguh ală broă lơh lơh bal đah kâp xã, ală mpồl lơh sa kă bro mờ cau lơh broă; lơh ală dơ̆ yal tơnggit jòi broă lơh, sền gròi tus broă rơ wah cau lơh broă geh bơta niam uă kung bè tă pơgồp jơnau đơs Ủy ƀan Ñân zân kơnhoàl in bè broă ai càn priă lòt lơh broă hờ lơgar ndai”.

Nghị quyết Pơrjum dờng Đảng ƀộ càr Dăk Lăk dơ̆ XVII ai tơlik broă jàu tơngai bơh nam 2021 tus nam 2025, càr Dăk Lăk lơh ngan ai geh broă lơh 150 rbô nă cau in; ai bơh 7 rbô tus 7 rbô 500 nă cau lòt lơh broă geh tơngai pơrgon tàm lơgar ndai. Tus tŭ do, khà cau lòt lơh broă tàm lơgar ndai jat sră pơrgon là 3 rbô 480 nă, ndrờm 50% broă rơndap lơh ai tơlik. Bè ală broă lơh nàng lam lơh jơnau kờñ do, ồng Nguyễn Quang Thuân, Phó Kwang atbồ Sở Lao động, Thương ƀiñ mờ Xã hội càr Dăk Lăk sồr: “Tŭ do, Sở kung neh cih gơs jơnau rơcang cih nàng tă pơgồp jơnau đơs ai Tỉñ ủy, Ủy ƀan Ñân zân càr in ai tơlik Rơndap broă bè Lòt lơh broă hờ lơgar ndai, ai cau Việt nam lòt lơh broă geh tơngai pơrgon tàm lơgar ndai jat sră pơrgon, mờ rơp sơlơ rề ơnàng rlau tai drà lơh broă, ngan là tiah câu Âu nàng geh uă bơta sac rơ wah ai ală cau tus bal in. Bơdìh hơ̆ tai, bol hi đơs là, pal geh bơta lơh bal bơh jơh gùt anih lơh broă cíñ trị dê, tàm hơ̆ geh bơta tus bal pràn kơldang bơh kâp ủy, gơnoar atbồ tàm ƀòn lơgar mờ tơrgùm tàm 2 kơnhoàl rƀah mờ ală cau rƀah tàm gùt càr nàng ai khi lòt lơh broă tàm lơgar ndai, dùl bơnah dong tơnguh priă lơh geh, dùl bơnah den ai geh mờng chài nàng rơcang lài cau lơh broă ai broă tam gơl pa lơh sa mờ măi mok dà lơgar dê tus do, tŭ càr gơ hòi gơ jà uă mpồl lơh sa kă bro bơcri priă tàm càr Dăk Lăk”.

Lòt lơh broă hờ lơgar ndai là dùl broă lơh ai geh broă lơh geh cồng nha, pah nam cèng wơl bơnah priă lơgar ndai uă ngan càr in, pơgồp bơnah bơto broă lơh, tơn jơh jơgloh tơrmù rƀah, tơnguh niam rài kis ai cau lơh broă in. Rài kis bơh uă cau lơh broă dê neh tam gơl kơnờm bơta tam gơl geh sơnđan Lòt lơh broă hờ lơgar ndai.