Jơnau yal chờ hờp là khà kờp bơh Kụk Lòt nhơl Dà lơgar Việt Nam dê pà gŏ tơnơ̆ 11 nhai bơh nam 2023, gah lòt nhơl lơgar Việt Nam neh wă 11 tơlak 200 rơbô dơ̆ năc lòt nhơl dunia mờ pơgap 100 dơ̆ năc lòt nhơl tàm lơgar, rlau 1 tơlak 100 rơbô dơ̆ năc dunia, uă rlau 4 dơ̆ pơndrờm mờ nam 2022. Mìng kờp tus jơh nhai 10 nam 2023, priă lơh geh bơh gah lòt nhơl dê là 556 rơbô tơmàn đong.

Ồng Nguyễn Công Hoan– Kwang atbồ Ƀan Yal tơngĭt Ală mpồl Lòt nhơl lơgar Việt Nam pà gĭt, geh 4 bơta nàng gơtùi lơh geh jơnau kờñ wă bơh 12 tus 13 tơlak dơ̆ năc dunia tàm nam do. Ồng Nguyễn Công Hoan, đơs:“Dơ̆ 1, hơ̆ là broă lơh ờ duh pal geh sră lòt rê, broă lơh pà sră lòt rê điện tử neh ngan ngồn geh mut lơh bơh ngai 15 nhai 08 nam 2023. Dơ̆ 2, nam 2023, broă lơh lơh broă mờ lơgar ndai bơh lơgar Việt Nam dê geh bơyai lơh duh hồl uă ngan. Mờ ală broă lơh do neh lơh geh cồng nha niam ngan tàm broă yal tơngĭt Dà lơgar, kòn bơnus lơgar Việt Nam dê mờ gơ hòi gơ jà năc lòt nhơl. Dơ̆ 3, broă lơh bơtàu tơnguh wơl gah niam chài bơh jơi bơtiàn dê bal mờ broă gĭt nền lòt nhơl là gah lơh sa tờm, uă ngan ală bơta kwơ niam chài, ală phan lời wơl niam chài lơgar Việt Nam neh geh lơh gơs ngan ngồn gơ gơs ală phan bơna niam ngan, ờs mờng krơi is, gơ hòi gơ jà năc lòt nhơl mờ geh bơta kwơ tàm pơrlòng uă. Dơ̆ 4 là, drà lòt nhơl dunia neh bơtàu tơnguh wơl, ală drà bơh yau bơh bol he dê neh bơtàu tơnguh wơl mờ mpồl năc bơh ală drà do dê tus mờ lơgar Việt Nam kung hời rơ hời lơh geh wơl jơnau kờñ bè lài mờ tơngai kòp dờng”.

Nàng pơn jat tai gơguh pràn kơl dang mờ lơh geh bơta bơtàu tơnguh mhar tàm nam 2024, jat ală kwang bàng jak chài mờ ală mpồl lơh sa kă bro jun pơndiang năc lòt nhơl, ală mpồl lơh sa kă bro, ală tiah mờ ală gah lơh broă pal tơrgùm tàm bàr pe kơnòl broă tờm kwơ màng. Tềng đăp mat, tơngai do gam là tơngai “Kwơ màng tờm ngan” nàng gơ hòi gơ jà năc lòt nhơl dunia, den tàng pal lơh pràn lam lơh geh cồng nha Nghị quyết sồ 82 bơh Cíñ phủ dê mờ uă broă lơh pràn kơl dang. Bal mờ Hà Nội mờ ƀòn dờng Hồ Chí Minh, ală tiah kung lơh pràn lam lơh ală broă wă rò sa tềp Tây nàng kờñ sơlơ tơnguh tai gơ hòi gơ jà năc lòt nhơl. Ồng Nguyễn Trùng Khánh– Kwang atbồ Kụk Lòt nhơl Dà lơgar Việt Nam dê, đơs:“Tơngai uă ngan lòt nhơl dunia là bơh nhai 10 nam lài tus nhai 4 nam tơnơ̆. Ală mpồl lơh sa kă bro lòt nhơl Việt Nam gam lơh broă rcang lài ală phan bơna lòt nhơl pa mờ lơh mhar broă lơh hòi jà, yal tơngĭt tus mờ ală drà năc geh jơnau kờñ lòt nhơl, ngan là tus bal ală drà lòt nhơl dunia dờng, geh ală drà lòt nhơl dunia ờs mờng”.

Sền wơl nam 2023, bulah gơ hòi gơ jà năc lòt nhơl dunia gơguh pràn kơl dang bè khà, mơya mờ bơta geh ngan, khà ngan ngồn den lơyah ir pơndrờm mờ ală lơgar tàm tiah do dê. Jat ồng Vũ Thế Bình– Củ tịc Mpồl lòt nhơl lơgar Việt Nam đơs là, bal mờ broă pơn jat tai lơh pràn gơ hòi gơ jà năc bơh ală drà bơh yau, pal lơh pràn mut lơh gơ hòi gơ jà năc câu Âu mờ drà tàm tiah ngài. Ồng Vũ Thế Bình đơs:“Năc lòt nhơl dunia là dùl tàm ală jơnau kờñ kwơ màng mờ gah lòt nhơl Việt Nam pal gơ hòi gơ jà geh. Nàng wă rò năc dunia den pal geh ală phan bơna pa, drơng broă pa di pal mờ năc dunia dê. Drà pa kung neh tam gơl, tŭ do ờ mìng geh ală drà rềp mờ ală drà ngài mờ bol he kung kwơ màng ngan”.

Gơwèt mờ drà lòt nhơl tàm lơgar, bulah nam 2023 geh bơta gơguh uă nơsina, mơya jat ală kông ty lam năc lòt nhơl, priă lơh geh bơh lòt nhơl tàm lơgar ờ hềt geh bè jơnau kơ̆p kờñ, tài bơh lơh sa gam kal ke, làng bol tă ngui lơyah, lài ngan sac rơwah ală broă lơh tơrmù giă dong kờl, lòt dùl ết ngan ala mờ sac rơwah tour kas priă jền mờ iŏ tơngai. Nàng gơ hòi gơ jà pràn kơl dang năc tàm lơgar, ồng Bùi Thanh Tú– Kwang atbồ Marketing Kông ty Lòt nhơl BestPrice đơs là: “Dơ̆ 1 là giă vĕ rơndeh par tus mờ ală tiah tus tàm lơgar pal geh gơmù nàng gơ hòi gơ jà jơnau kờñ lòt nhơl bơh năc lòt nhơl dê. Bol he gơtùi sền gŏ tàm nam 2023 geh bàr pe tŭ tơngai giă vĕ rơndeh par par tus Phú Quốc halà Nha Trang gơguh uă gơrềng tus tơn jơnau kờñ lòt rê bơh năc lòt nhơl dê. Dơ̆ 2 hơ̆ là bơtàu tơnguh lòt nhơl kơ̆ kơl jăp, gàr geh bơta niam geh is, pleh bơta bơcri priă lơh ur ar jat srơh den năc lòt nhơl mìng tus 1 dơ̆ den hơ̆ sồng ờ gŏ lòt tai. Dơ̆ 3 hơ̆ là ală tiah pal lơh jat ală broă lơh yal tơngĭt, hòi jà lòt nhơl pơgồp bal mờ lơh pa phan bơna lòt nhơl nàng gơ hòi gơ jà năc lòt nhơl: tàm nam pa do bol he gơtùi gŏ Hà Nội mờ Festival kàl hàm Hà Nội, halà Tơngleh lòt nhơl Hồ Chí Minh neh lơh niam ngan ală broă lơh do nàng gơ hòi gơ jà năc tus mờ ù tiah he dê”.

Tàm pơrjum Bơtàu tơnguh lòt nhơl lơgar Việt Nam mhar, kơ̆ kơl jăp pa do, Thủ tướng Cíñ phủ Phạm Minh Chính đơs sùm, lòt nhơl geh sền gĭt là dùl gah lơh sa tờm, pơgồp bơnah kwơ màng tàm broă lơh geh broă lơh, tơn jơh jơgloh, tơrmù rƀah, gơ hòi gơ jà bơcri priă, sơlơ gơguh lơh sa mờ tam gơl rơndăp tăp sèng rài lơh sa, prap gàr mờ ngui niam bơta kwơ bơh yau, kah yau, niam chài bơh jơi bơtiàn, bơtàu tơnguh rài kis phan bơna mờ nùs nhơm bơh làng bol dê. Nàng bơtàu tơnguh lòt nhơl gơ gơs gah lơh sa tờm jat nùs nhơm đơng lam bơh Ƀộ Cíñ trị dê, jat Thủ tướng, lòt nhơl Việt Nam pal ngan ngồn geh bơta tam gơl bồ tơngoh kơlôi sơnơng, broă lơh mờ ală broă lơh bơceh lơh, bơtàu tơnguh mhar, dùl ròt bal; geh cồng nha; lơh jat “Lơh bal ngan, pơgồp bal niam, lơh broă bal tơl làm”.