Dơ̆ tơngăc mpồl ling klàng làng bol Việt Nam rê wơl tàm lơgar geh bơyai lơh tàm ƀlàng rơndeh par Hatay tàm Antakya, tiah tờm càr Hatay, lơgar Thổ Nhĩ Kỳ dê.

Đơs tàm dơ̆ tơngăc, Đại sứ ồng Đỗ Sơn Hải đơs loh broă Mpồl ling klàng làng bol Việt Nam ai mpồl tus dong kờl rềs àr tàm lơgar Thổ Nhĩ Kỳ ală ngai do là tềl tơngŏ pơgồp bơnah sơlơ tơnguh bơta gĭt gơ̆p đah 2 gah dê. Bàr mpồl ling klàng làng bol Việt Nam mờ Ƀộ Kwang àng Việt Nam neh bơsong uă kal ke, ờ ngòt bơta ngòt rơngơ̆t, lơh ngan dong làng bol Thổ Nhĩ Kỳ bơsong jơnau gơ lời wơl tài tơruh ù lơh aniai, geh làng bol, gơnoar atbồ lơgar do dê mờ ală mpồl dong kờl rềs àr dunia pin dờn, jờng rơ uă ngan. Tàm tơngai lam lơh bơh ngai 13 tus ngai 22 nhai 2 tus càr Hatay, Mpồl ling klàng làng bol Việt Nam neh lam lòt jòi tàm 31 tiah, sền gŏ 15 tiah geh cau tàm gơn ru tơrlah tơrlơm dê, tàm hơ̆ geh 2 tiah geh tềl tơngŏ gam geh cau kis. Tơnơ̆ hơ̆, mpồl neh tàm jàu ai mpồl lơh broă dong kờl rềs àr tiah do in ngui phan bơna kơn jơ̆ tờ jòi mờ jun geh 28 bồc cau chơ̆t lik hờ bơdìh. Mho ngai 23/2, mpồl neh rê tus Nội Bài, Hà Nội.