Ƀộ trưởng Ƀộ Tài cíñ ồng Hồ Đức Phớc, Phó Kwang atbồ Mpồl lơh broă sùm mpồl đơng lam 389 dà lơgar neh đơng lam pơrjum. Tàm pơrjum, yal jơnau yal bơh Mpồl đơng lam 389 dà lơgar dê, Kwang atbồ Cơldŭ lơh broă sùm Mpồl đơng lam 389 dà lơgar ồng Lê Thanh Hải đơs loh, nam 2022 mpồl lơh broă geh gơnoar gùt lơgar neh git gŏ, kup bàn, lơh glài mờr 140 rbô broă lơh tìs, gơguh 1,17% pơndrờm mờ bal dùl tŭ nam 2021.

Nàng kờñ lam lơh geh cồng nha broă lơh rơcang sơndră phan tìs mờ adat boh lam, blac pơrlồm kă bro mờ phan ờ ngan nam 2023, Mpồl đơng lam 389 dà lơgar sồr Mpồl đơng lam 389 ală Ƀộ, gah broă lơh dà lơgar, càr, ƀòn dờng gơ wèt dà lơgar rơcang lài git gŏ, đơs lài di broă gơlik geh; git nền gơl gùng, ù tiah, cau tờm, bơta phan, broă lơh gơlik geh; đal git gùng dà, kai lơh broă, ai tơlik ală broă lơh dipal nàng kờñ rơcang sơndră, kơryan geh cồng nha ală broă lơh tac bro phan tìs mờ adat boh lam, blac pơrlồm kă bro mờ phan ờ ngan gơ wèt gah broă lơh, ù tiah he drơng lơh, atbồ.