Dơ̆ pơrlòng jơh bơsram kấp pe nam do càr Kon Tum geh 5 rơbô 28 nă cau tus pơrlòng, tàm hơ̆ geh rơlao 1 rơbô 700 nă cau pơrlòng là kòn cau. Gùt càr geh 12 anih pơrlòng mùl màl mờ 224 jơdŭ pơrlòng mờ 9 anih pơrlòng rơcang lài mờ 184 jơdŭ pơrlòng. Ngai òr (27/06), Mpồl kwang bàng sền bè broă đơng lam, bơyai lơh sền pơrlòng mờ broă lùp sền, sền Dơ̆ pơrlòng jơh bơsram kấp pe nam 2023 bơh Ƀộ Giáo zụk mờ Đào tạo geh Thiếu tướng Nguyễn Văn Thế, Phó Cíñ ủy Hìu bơsram Nguyễn Huệ, Ƀộ Quốk phòng lam bồ neh lơh broă mờ mpồl kwang bàng duh broă dơ̆ pơrlòng Sở Giáo zụk mờ Đào tạo càr Kon Tum, mờ tus sền mùl màl tàm ală anih pơrlòng.

Jơnau đơs bơh Mpồl kwang bàng tus sền pà gŏ, càr Kon Tum neh rơcang lài ai dơ̆ pơrlòng jơh bơsram kấp pe lơngăp lơngai, nền nòn. Mpồl duh broă pơrlòng Sở Giáo zụk mờ Đào tạo càr Kon Tum neh lơh jăt mờ bơyai lơh jăt niam ală sră nggal đơng lam bơh Thủ tướng Cíñ phủ, kơrnoăt, jơnau bơto sồr bơh Ƀộ Giáo zụk mờ Đào tạo bè Dơ̆ pơrlòng jơh bơsram kấp pe nam 2023 di pal mờ bơta tàm mùl màl. Mpồl kwang bàng lơh broă geh pơgồp bal nền nòn mờ ală gah lơh broă geh gơnoar tàm càr nàng bơsong di tŭ di lah geh ală bơta gơlik geh pơgồp bal tàm broă gàr niam dơ̆ pơrlòng geh bơyai lơh lơngăp lơngai, nền nòn.