Pơrjum geh bơyai lơh mờ broă lơh pơrjum tơn tàm Anih lơh broă Hội đồng Ñân zân càr Dăk Lăk mờ pơrjum pờ tơlik tơn tàm internet tàm 6 anih tàm tơrbŏ bal ală kơnhoàl Cư Mgar, Krông Ana, M’drăk, Ea Kar, Krông Bông, Lăk. Rlau 1 rơbô 200 nă cau tĕ khà neh tus bal Pơrjum tìp mat mờ cau tĕ khà dơ̆ do.

Đơs tàm pơrjum, Mpồl kwang bàng Quôk hội càr Dăk Lăk ưn ngài ală jơnau đơs tă pơgồp jơh nùs ngan, geh ngan ngan, tơngŏ nùs nhơm geh kơnòl bơh cau tĕ khà dê. Mơkung cribơyai tơn, lơh loh tai ală broă mờ cau tĕ khà sền gròi mờ đơs nền ală jơnau đơs, jơnau dan rơ̆p geh Mpồl kwang bàng Quôk hội càr mờ ală kấp, ală ngàñ tơrgùm bal, yal mờ kấp geh gơnăp gơnoar in gờñ bơsong jat jơnau cih, lơh geh bơta pin dờn kơ̆p gơn mờ bơta kơ̆p kờñ di pal bơh cau tĕ khà dê.

Tàm 2 ngai bơh ngai 30 nhai 11 tus ngai 1 nhai 12, Mpồl kwang bàng Quôk hội càr Dăk Nông neh lơh jăt ală pơrjum tìp mờ cau tĕ khà tàm xã Dăk N’drót, kơnhoàl Dăk Mil, xã Tâm Thắng kơnhoàl Cư̆ Jút, xã Dăk Hoà, kơnhoàl Dăk Song mờ sơnah ƀòn Quảng Thành ƀòn dờng Gia Nghĩa.

Tàm ală anih tìp, tơnơ̆ mờ tŭ iăt ală kwang bàng Quôk hội yal cồng nha Pơrjum dơ̆ 6, Quôk hội khoă XV, cau tĕ khà tơlik nùs nhơm chờ hờp bè cồng nha bơh pơrjum dê, mờ đơs niam ală broă lơh ngan bơh ală kwang bàng càr Dăk Nông dê neh di tŭ pơgồp jơnau đơs tàm uă broă lơh kwơ màng tàm mùl màl, di pal mờ jơnau kơ̆p kờñ bơh cau tĕ khà dê. Cau tĕ khà càr Dăk Nông kung dan lơh jăt niam rơlao tai broă lơh rài kis lơh sa mpồl bơtiàn, pal dong kờl Bảo hiểm Y tế ai làng bol gơtìp kal ke in; tàm hơ̆ uă ngan là geh broă dong kờl bè priă nhai, broă lơh di pal gơwèt mờ mpồl kwang bàng lơh sơnơm, cau pơgru mờ bơsong di pal bơta ờ tơl sơnơm sơm kòp, ờ tơl vačcine cit ai kơnòm dềt in.