Phó Thủ tướng Cíñ phủ ồng Trần Lưu Quang đơng lam dơ̆ lơh broă. Ală jơnau yal đơs nền, Tây Nguyên geh uă bơta ƀuơn tàm bơtàu tơnguh lơh sa bè: lơh sa suơn sre, lơh mờ măi mok lơh gơlik phan bơh suơn sre, brê bơnơm, năng lượng lơh geh wơl, bơtàu tơnguh lơh mờ măi mok tơnhàu phan, lơh gơlik bauxite, bơtàu tơnguh lòt nhơl gơ jat bal mờ niam chài jơi bơtiàn. Bulah bè hơ̆, bơtàu tơnguh lơh sa tiah do ờ hềt geh bơta tam gơl pràn, ală gah lơh sa tờm tă pơgồp ờ hềt loh làng.

Kwang đơng lam bồ ală càr Tây Nguyên đơs là, mờ gơnoar broă kuơmàng, Tây Nguyên pal geh gùng dà, broă lơh krơi is nàng tiah do ngui bơta pràn, lik bơh tiah lơyài bơtàu tơnguh bơh gùt lơgar dê. Ring bal mờ jơnau đơs hơ̆, Phó Thủ tướng Cíñ phủ ồng Trần Lưu Quang đơs nền, Tây Nguyên là tiah sùm geh gơnoar broă, bơta kuơ dờng ngan bè lơh sa, cíñ trị, mpồl bơtiàn, sền gàr dà lơgar, lơngăp lơngai bơh gùt lơgar dê, den tàng nùs nhơm bal là pal geh bơta ai lài bè gùng dà, broă dong kờl, priă jền ai tiah do in tàm tơngai tus.