Đơs tàm dơ̆ mut lơh, ồng Võ Văn Thưởng- Ủy viên Ƀộ Cíñ trị, Thường trựk Ƀan Ƀí thư Đảng dà lơgar đơs nền, Đảng he git nền, kwang bàng bơta lơh nền tus cồng nha halà ờ jai bơh kac màng dê. Bơt bơtàu mpồl kwang bàng, ngan là kwang bàng kâp kuơmàng jŏ jòng là kơnòl dờng màng khà dùl, là broă dờng màng bơh Đảng dê, pal geh lơh sùm, git kơrhia, jak chài, nền nòn mờ geh cồng nha.

Bơcri priă bơt bơtàu mpồl kwang bàng in mờ bơcri ai bơtàu tơnguh jŏ jòng, kơ̆ jơljap in. Bè hơ̆ den tàng, ơdŭ bơto pơlam yal jơnau git wă gơ wèt mờ Ủy viên rơcang lài Ƀan Cấp hàñ Đảng dà lơgar khoă XIII dơ̆ do geh uă tam gơl pa bè tơngume broă lơh, lam lơh ơdŭ bơsram. Kuơmàng là broă rơ wah 29 tơngume gơ glòm uă tơngume kuơmàng gơ jat bal mờ ală broă tờm tàm sră nggal Pơrjum gùt lơgar dơ̆ XIII bơh Đảng dê, ală Nghị quyết Pơrjum Đảng dà lơgar khoă XIII bè bơt bơtàu Đảng mờ Dà lơgar, bè bơtàu tơnguh lơh sa, mpồl bơtiàn, niam chài kòn bơnus Việt Nam, bè sền gàr lơngăp lơngai mờ cribơyai broă mờ lơgar ndai, bè jak chài, đơng lam bồ, atbồ tàm tŭ tơngai pa.