Geh lơh tàm 5 ngai, Ủy ƀan Thường vụ Quôk hội ai jơnau đơs tàm uă tơngume kuơmàng, tàm hơ̆ ai jơnau đơs bè broă rơcang ai sră đùh pin dờn gơ wèt mờ cau at gơnoar broă bơh Quôk hội pồ halà kĭ tơn pồ tàm pơrjum dơ̆ 6, Quôk hội khoă XV. Đơs mut pơrjum, Củ tịc Quôk hội ồng Vương Đình Huệ pà git, khà broă uă, geh bơta kal ke uă, tŭ tơngai jal mhar. Củ tịc Quôk hội sồr ală kwang bàng tàm Ủy ƀan Thường vụ Quôk hội đòm jat nùs nhơm ală dơ̆ pơrjum lài nàng ai jơnau đơs tàm ală tơngume nàng gàr bơta niam dơ̆ pơrjum dê là niam ngan rlau jơh. Bơh sền sơ wì tơl làm broă rơcang lài mờ ală tơngume yal Quôk hội in, tơnơ̆ tŭ cih dờp jơnau đơs bơh ală kwang bàng Quôk hội, ală mpồl kwang bàng Quôk hội dê, Ủy ƀan Thường vụ Quôk hội rơp ai jơnau đơs dơ̆ dut ndơl bè tơngume pơrjum dơ̆ 6  nàng yal Quôk hội in sền sơ wì, pờ tê ring bal tàm pơrjum rơcang lài.