Digơlan dơ̆ pơrjum rơ̆p geh lơh bơh ngai 05 tus jơh ngai hìng 07/07, ring bal 2 kơrnoăt bè kwang bàng mờ sền swì, ring bal 22 kơrnoăt gơrềng tus ală broă bơcri priă dà lơgar, lơh sa, mpồl bơtiàn tàm càr. Bè broă lơh kwang bàng, ala măt Ủy ƀan Ñân zân càr Gia Lai, ồng Trương Hải Long, Củ tịc Ủy ƀan Ñân zân càr Gia Lai sền sră yal bè broă pồ ồng Phạm Minh Trung, Kwang ătbồ Sở Tài nguyên mờ Môi trường lơh kwang bàng Ủy ƀan Ñân zân càr. Cồng nha tĕ khà tơnơ̆ hơ̆ tơn, ồng Phạm Minh Trung neh geh pồ bal mờ khà sră pồ 62 tàm 63 sră.

Digơlan tàm dơ̆ pơrjum do, Hội đồng Ñân zân càr Gia Lai rơ̆p sền swì 22 jơnau rơcăng cih kơrnoăt bơh Ủy ƀan Ñân zân càr Gia Lai dê. Tàm hơ̆, geh uă jơnau rơcăng cih kơrnoăt kwơmàng, bè: tam gơl broă rơndăp lơh bơcri priă dà lơgar nam 2023 priă ai bơh kes priă càr dê; tam gơl broă rơndăp lơh bơcri priă dà lơgar di mơ tơngai; tam gơl jơnau kờñ ngui ù brê tus jơnau kờñ ngui ndai nàng lơh rơndăp broă lơh gùng lòt ală xã tàm kơnhoàl Kông Chro.

Tàm ƀòn dờng Kon Tum, Hội đồng Ñân zân càr Kon Tum sơnđờm mut pơrjum dơ̆ 05, khoă XII, tơngai lơh broă bơh nam 2021-2026. Tàm pơrjum, Hội đồng Ñân zân càr Kon Tum rơ̆p sền sơwì, jat sền cồng nha lơh broă bơh ală anih lơh broă, mpồl lơh broă dê jat jơnau sồr; cribơyai, đơs ală bơta lơh sa- mpồl bơtiàn 6 nhai bồ nam 2023, sền gĭt rơndap broă lơh, kơnòl broă tờm 6 nhai lồi nam 2023 mờ lơh nền ală tơngume gơwèt mờ gơnap gơnoar.

Geh bơyai lơh bơh tŭ do tus ngai 7/07, Pơrjum dơ̆ 05, Hội đồng Ñân zân càr Kon Tum khoă XII, tơngai lơh broă bơh nam 2021-2026 rơ̆p sền sơ wì, lơh nền gơwèt mờ 32 tơngume Ủy ƀan Ñân zân càr dê yal tàm pơrjum, tàm hơ̆, geh bàr pe broă lơh kwơ màng, bè: khà dong kờl nàng lơh jat broă lơh rơndap tiah làng bol ơm kis ală tiah gơtìp trồ tiah lơh aniai, tiah kal ke uă, tiah nhàr lơgar, làng bol ntrờn ơm kis khat gơboh, tiah brê kwơ màng tàm ù tiah càr dê; tam pà priă dong kờl bơtàu tơnguh Hợp ták xã; tam gơl broă rơndap lơh lơh jat ală broă lơh jơnau kờñ dà lơgar nam 2022, 2023 mờ kờp dŭ lài rơndap broă lơh tam pà broă rơndap lơh bơcri priă dà lơgar nam 2024.