Là dùl tàm ală đảng viên geh dờp sră tềm pềr, ồng Trần Thanh Tâm, pơrjum tàm Ci ƀộ sơnah ƀòn Bình Tân, thị xã Buôn Hồ, pà gĭt: pơgăp mờ do 6 nam, ồng gơtìp rềs àr gùng lòt, 2 nam sơnrờp pal ơm bĭc dùl anih. Tus dì tŭ lòt rê wơl gơtùi den ồng kung gam lơbơn ờ pràn ngan sơl, jơh ală broă tàm rài kis kơnờm jơh lơm tàm pơ ùr mờ oh kòn. Bơta pơndờm pơnđiang, dong kờl bơh phan bơna tus nùs nhơm bơh ală oh mi tàm ci ƀộ dê mờ làng bol tàm ƀòn lơgar dê là bơta gơn kơnờm dờng ngan dong ùr bơklau ồng geh tai bơta pràn nàng sơrlèt gan mờ bơta kòp jê, sơrlèt gan bơta kal ke tàm rài kis. Ồng Trần Thanh Tâm, đơs: Tŭ gơtìp rềs àr tus tŭ jiơ do añ kung geh gơnoar ătbồ ƀòn lơgar sền gròi ngan, halà tus pơndờm pơnđiang pràn kơldang să jan nàng pơđơl pràn sơrlèt gan kòp tê jê să, he lơbơn ñâm ño, ờ lơh geh bơta lơi mìng kơnờm jơh lơm tàm pơ ùr mờ kòn he dê.

Kung neh geh tŭ gơtìp rềs àr gùng lòt mờ geh dờp sră tềm pềr Mŭt mơ̆ rơmĭt, đảng viên bi Y Mơi Ktla, pơrjum tàm Ci ƀộ ƀòn Dlung 1B, sơnah ƀòn Thống Nhất, thị xã Buôn Hồ, pà gĭt, hìu bơnhă là hìu rƀah, mìng geh 4 sào ù mìr. Dờp khà priă dong kờl 5 tơlak đong, hìu bơnhă bi neh bơcri sơngka sền gàr chi tam, bal mờ bơta gơn kơnờm rơ̆p tơnguh geh cồng nha lơh geh, tơnguh uă priă lơh geh ai hìu bơnhă in. Bi Y Mơi Ktla, đơs: Ưn ngàn gah Đảng ủy sơnah ƀòn pà sră tềm pềr nàng tơnguh tai priă lơh geh ai hìu bơnhă in. Sră tềm pềr hơ̆ geh priă nàng blơi phơng sih sền gàr kơphê mờ blơi sơntìl chi tam mờ blơi sơnơm tơm ba sơm kòp ai să tờm in.

Ndrờm bè hơ̆ sơl, bal mờ sră tềm pềr geh dong kờl, đảng viên mò H’Môi Buôn Yă, pơrjum tàm Ci ƀộ ƀòn Dlung 1A, sơnah ƀòn Thống Nhất neh tềm pềr tai nàng blơi dùl nơm kơnrồ rê ròng. Mò H’Môi Buôn Yă, đơs: Pa do, añ geh dờp sră tềm pềr mŭt mơ̆ rơmĭt, bulah ờ geh uă mơya añ gŏ gơlơh chờ hờp ngan, dong kờl añ geh đau dùl bơnah priă jền lơi hơ̆ nàng dong rài kis lơh sa bơh añ dê tŭ hơ̆.

Broă lơh “Sră tềm pềr Mŭt mơ̆ rơmĭt” geh Thị ủy Buôn Hồ lam lơh bơh nhai 3 nam 2023. Jăt mờ hơ̆, tơl nă kwang bàng, đảng viên tàm jơh gùt thị xã lơh jăt tềm pềr bơh uă broă lơh bè tă dùl ngai priă nhai, dờp lơh ală broă, bơnah broă lơh geh priă jền lơh sa nàng lơh geh kes priă. Jơnau kờñ là pah nam tơl đảng ƀộ kơnă hơđơm tềm pềr geh dùl tus bàr “Sră tềm pềr Mŭt mơ̆ rơmĭt”; tơl ci ƀộ kơnă hơđơm tềm pềr geh dùl “Sră tềm pềr Mŭt mơ̆ rơmĭt”. Tơnơ̆ 6 nhai lam lơh, thị xã neh tơrgùm geh mờr 400 tơlak đong, lơh 73 sră tềm pềr, kờp priă tơl pang sră là 5 tơlak đong, jàu pà ai ală đảng viên geh rài kis kal ke tàm ƀòn lơgar.

Mò Nguyễn Thị Thu Nguyệt, Ƀí thư Thị ủy thị xã Buôn Hồ, pà gĭt, srơh “Sră tềm pềr Mŭt mơ̆ rơmĭt” là broă lơh ờ gŏ pa ờ mơya broă lơh geh ală tam gơl pa neh cèng wơl cồng nha uă. Do là broă lơh geh kwơ ngan, tơngŏ gơnoar broă, kơnòl broă loh làng bơh tơl nă kwang bàng, đảng viên mờ tơl mpồl đảng dê tàm broă bơsram mờ lơh jăt Wa Hồ. Broă lơh mờ jàu pà “Sră tềm pềr Mŭt mơ̆ rơmĭt” gam pơgồp bơnah bơ̆t bơtàu mpồl kwang bàng lơh krơh bè nùs nhơm, rài kis, đềt mềr mờ mpồl Đảng. Mò Nguyễn Thị Thu Nguyệt, đơs: Gơtùi đơs bơh sơnrờp priă do ờ hềt uă mơya gơ kung lơh geh cồng nha, bơta lơh gơrề uă tàm ală mpồl đảng tàm jơh gùt thị xã mờ kwơmàng là lơh geh cồng nha sền gròi uă ngan bơh kwang bàng, đảng viên tàm tơl ƀòn lơgar dê. Bơta kwơmàng dờng ngan rlau jơh, dùl bơta kwơ cíñ trị đảng tàm do hơ̆ là bơh broă jàu sră tềm pềr mŭt mơ̆ rơmĭt do nàng pơgồp kơnòl broă mờ bơta gĭt wă bơh đảng viên dê mờ broă tus bal pơrjum mpồl đảng tàm ƀòn lơgar, ngan là ci ƀộ kâp hơđơm tàm ƀòn lơgar nàng tơnguh uă cồng nha pơrjum ci ƀộ tŭ do.

Broă lơh “Sră tềm pềr Mŭt mơ̆ rơmĭt”gam cèng wơl ală cồng nha geh kwơ ngan, tơngŏ nùs nhơm niam chài kòn bơnus jrô ơnàng, geh đảng viên mờ làng bol tàm thị xã Buôn Hồ, càr Dăk Lăk jờng rơ ngan, lơh geh bơta pràn lơh gơrề uă tàm jơh gùt mpồl bơtiàn.