Ồng K’ Ních, kwang atbồ ƀòn Dur 01, xã Dur Kmal, kơnhoàl Krông Ana, càr Dăk Lăk ngoh rơngăc mờ pơnyờ să ngan neh tŭ tìp Tổng Ƀí thư ồng Nguyễn Phú Trọng tàm Ngai chờ tam klăc ală jơi bơtiàn nam 2018. Ồng gŏ nùs nhơm đềt mềr, tam pà bal bơh kwang đơng lam dờng ngan Đảng dê gơwèt mờ làng bol. Ồng K’ Ních pà git: “Kơno yal mờ geh tìp tơn tàm ngai hơ̆, añ gŏ wa là dùl nă cau niam nùs, gơlơh bè bèp tờm añ dê. Wa sùm nting bơto là jơh ală kwang bàng mờ làng bol pal tam klăc bal nền nòn, git tơmù ală bơta gam ờ pràn nàng bơtàu tơnguh bal. Bơh tŭ hơ̆ tus tŭ do kung neh 05 nam bloh, bơh jơnau nting bơto wa dê den làng bol lơh jăt niam ngan”.

Pơnyờ să neh geh 02 dơ̆ tìp mờ Tổng Ƀí thư ồng Nguyễn Phú Trọng tàm ală pơrjum bè bơta niam chài, cau chài cih văn Niê Thanh Mai, Củ tịc Mpồl văn họk nghệ thuật càr Dăk Lăk kah wơl tơl jơnau đơs bơh Tổng Ƀí thư dê bè tam klăc jơi bơtiàn. Mò Niê Thanh Mai yal, ală jơnau sồr bơh Tổng Ƀí thư dê tàm Pơrjum gùt lơgar bè bơta niam chài nam 2021 neh geh càr Dăk Lăk lơh jăt nền nòn. Mò Niê Thanh Mai pà git: “Tam klăc jơi bơtiàn tàm văn họk nghệ thuật mờ bơh văn họk nghệ thuật den bol añ kung neh lơh geh ală broă lơh, ală broă rơndăp lơh tàm jơnau cih bơh ală cau chài dê; Lơh bè lơi gŏ geh gơnoar bal mờ broă tam klăc bal bơh ală jơi bơtiàn mờ uă ngan là broă tam klăc bal, broă tus bal bơh uă mpồl bơh kwang àng, cau ling, ơruh pơnu, cau ùr… Tơnơ̆ pơrjum niam chài gùt lơgar tềng đăp mờ broă đơng lam bơh Tổng Ƀí thư ồng Nguyễn Phú Trọng dê den di gơlan nùs nhơm bal mờ broă tam klăc jơi bơtiàn rơ̆p gam uă rơlao tai mờ geh lơh geh uă bơh niam chài, văn họk nghệ thuật dê”.

Sền tơl pang rùp geh kŭp rùp bal mờ Tổng Ƀí thư ồng Nguyễn Phú Trọng, mò H Yam Buôn Krông, kis tàm ƀòn Tơng Jú, xã Ea Kao, ƀòn dờng Buôn Ma Thuột, càr Dăk Lăk ngoh rơngăc yal, mò pơnyờ să 2 dơ̆ geh tìp Tổng Ƀí thư. Kwơ màng tàm nam 2011, mò mờ ală oh mi gam tàñ gơs ào kòn cau Rơđê dê niam ngan nàng pà Tổng Ƀí thư tŭ Tổng Ƀí thư tus còp ƀòn.

Mò H Yam Buôn Krông pà git: “Tŭ kơno jơnau yal là geh sơn đờm jòi ală brài nàng tàñ pà Wa in, pơyoa nùs nhơm kờñ gơboh, jơnau git wă bơh să tờm dê gơwèt mờ Wa. Dơ̆ bàr tìp Wa là tŭ añ geh tus Pơrjum jờng rơ cau chài, cau ngăc ngar, cau lơh sa kă bro pơnrơ jăk mờ cau geh bơngă pin dờn jơi bơtiàn ờ gal cau geh bơyai lơh tàm Hà Nội. Añ gŏ gơlơh kờñ gơboh ngan mờ ală jơnau Wa nting bơto mờ làng bol jơi bơtiàn ờ gal cau đơs is mờ gùt lơgar đơs bal, pal bơ̆t bơtàu mpồl tam klăc, geh tam klăc den hơ̆ sồng geh cồng nha”.

Ồng Hà Ngọc Đào, Kwang atbồ Sở Bơto bơtê mờ Bơsram càr Dăk Lăk lài do pà git, nam 2011, tŭ Tổng Ƀí thư ồng Nguyễn Phú Trọng sơn đờm guh at gơnoar broă đơng lam Đảng Dà lơgar, kung là tŭ rơcang ai Rơndăp broă tam gơl pa tờm, tơl ală bơta broă bơto bơtê mờ bơsram dê. Mờ uă jơnau đơng lam nền nòn bơh Tổng Ƀí thư dê, tus tŭ do, tơnơ̆ 10 nam lơh jăt Jơnau lơh nền bơh Dà lơgar, broă bơto bơtê mờ bơsram lơgar he neh geh ală broă bơtàu tơnguh pràn kơl dang mờ neh lơh geh uă cồng nha kwơ màng, tàm hơ̆ is ồn là tàm tiah làng bol jơi bơtiàn ờ gal cau, tiah nhàr lơgar, tiah bồt dà lềng. Nàng di pal mờ nùs nhơm pin dờn kờñ gơboh bơh Tổng Ƀí thư neh ai gah bơto bơtê mờ bơsram dê.

Ồng Hà Ngọc Đào yal: “Wa Trọng roh là dùl bơta hoàc huơr uă ngan gơwèt mờ dà lơgar. Mìng is să tờm añ ngoh rơngăc ngan, pơlai uă ngan. Là đảng viên añ pin dờn tàm Mpồl duh broă Đảng Dà lơgar geh đơng lam dà lơgar sơrlèt mờ bơta kal ke do. Tŭ do pal lơh bơta moăt gơs bơta pràn tàm broă lơh. Làng bol pin dờn tàm Đảng, tam klăc bal ală cau dùl nùs, tam klăc ală jơi bơtiàn, tam klăc tàm Đảng, tam klăc tàm làng bol di jăt jơnau kơ̆p kờñ tŭ wa Trọng gam kis”.

Kah sùm ală jơnau nting bơto bơh Tổng Ƀí thư tàm Ngai chờ tam klăc gùt jơi bơtiàn tàm càr Dăk Lăk nam 2018, ồng Y Giang Gry Niê Knơng, Củ tịc Anih duh broă Mặt trận Dà lơgar Việt Nam càr Dăk Lăk tơlik nùs nhơm bè do: “Tổng Ƀí thư ồng Nguyễn Phú Trọng sùm sền broă tam klăc gùt jơi bơtiàn là bơta tờm kwơ màng, là bơta pràn tờm ngai bơh dà lơgar dê. Lơh jăt jơnau bơh Tổng Ƀí thư, Anih duh broă Mặt trận Dà lơgar Việt Nam càr Dăk Lăk pơn jăt tai lơh jăt niam broă tơrgùm bal, tam klăc bal ală làng bol, làng bol ală jơi bơtiàn, gah jăt yàng, dùl nùs bal tài mpồl bơtiàn, bơ̆t bơtàu ƀòn lơgar pas gơs niam bơnĕ, gơguh jăk, geh uă bơta niam chài krơi is”.