Jơnau yal mờ mpồl kwang bàng lơh broă, ala măt Tỉñ ủy Sóc Trăng pà git, bơh bồ nam lơh broă 2021 tus 2025 tus tŭ do, càr Sóc Trăng neh mờ gam lơh jăt uă broă lơh, rơndăp broă lơh tờm pơgồp bal tàm broă lơh pràn broă bơtàu tơnguh lơh sa mpồl bơtiàn càr dê, tàm hơ̆ geh ờ uă rơndăp broă geh gơrềng uă ngan tus mờ broă bơtàu tơnguh lơh sa mpồl bơtiàn, kờp tŭ tus nam 2025 geh ai ngui bè: Gùng rơndeh ntoăt jờl Châu Đốc – Cần Thơ – Sóc Trăng; Rơndăp broă lơh Gơl gùng tờm bơtàu tơnguh lơh sa Đông Tây; Gùng jăt gah I, Jăt gah II… Khà gơguh lơh sa tàm 3 nam tơngai bơh nam 2021 tus 2023 geh 5,76% tàm 1 nam.

Lơh sa suơn sre bơtàu tơnguh jăt broă lơh geh bơta niam uă mờ bơta kwơ gơguh. Khà kòi bơkah, kòp niam uă geh rơlao 90%. Uă broă ròng kati geh cồng nha neh geh càr lơh uă… Đơs tàm dơ̆ lơh broă, Phó Củ tịc Quốk hội ồng Trần Quang Phương kơ̆p kờñ Đảng ƀộ mờ gơnoar atbồ bal mờ làng bol càr Sóc Trăng pơn jăt tai ngui nùs nhơm tam klăc, tơmù ală bơta kal ke, sơrlèt mờ bơta lòng lơh gơs ală jơnau kờñ mờ Nghị quyết Pơrjum dờng Đảng dơ̆ 13 mờ Pơrjum dờng Đảng ƀộ càr dơ̆ XIV neh geh ai.