VOV4.K’ho- Di Tơngkah kir sơnrai 75 nam Ngai Cau ling sồt să- Cau ling chơ̆t màng (27/07), drim ngai 06/07, tàm Hìu duh broă Củ tịc, Phó Củ tịc lơgar mò Võ Thị Ánh Xuân tìp măt mpồl cau ala măt cau geh màng mờ dà lơgar pơnrơ jak càr Bắc Kạn dê. Tơm bơh bơr bal mờ cau ala măt cau geh màng mờ dà lơgar, Phó Củ tịc lơgar mò Võ Thị Ánh Xuân đơs niam ngan càr Bắc Kạn bulah gam tìp uă kal ke mơya sùm lơh niam broă lơh kis gĭt jơnau gĭt adat, lơh jăt broă lơh sền gàr ờdo ờdă rài kis mpồl bơtiàn bơh tiah he dê, hòi tơrgùm bơta pràn kòn bơnus bơta pràn phan bơna jơh gùt mpồl bơtiàn dê nàng sền gròi ai cau geh màng mờ dà lơgar in.

Phó Củ tịc lơgar sồr càr Bắc Kạn pơn jăt tai đòm jăt ală cồng nha neh lơh geh tàm tơngai pa do; jơh nùs mblàng yal jrô ơnàng làm uă, bơto bơtê bơhiàn kờñ gơboh dà lơgar bơh jơi bơtiàn dê tàm ală rơnàng làng bol mờ jơh gùt mpồl bơtiàn bè bơhiàn sền gàr dà lơgar, kah rơngal cau geh màng mờ dà lơgar tàm tơngai tŭ do; kờp sền wơl bơta geh ngan rài kis bơh cau geh màng mờ dà lơgar tàm ù tiah càr dê bè rài kis, broă lơh, pràn kơldang să jan, priă lơh geh nàng dan mờ Dà lơgar, dong kờl ai cau geh màng mờ dà lơgar in gơ in di tŭ.

Cau mblàng Lơ Mu K’Yến