Tàm dơ̆ wă rò, Phó Củ tịc lơgar chờ hờp sền gŏ lơh broă bal bơta gĭt gơ̆p lơh broă bal đah 2 lơgar tàm tơngai pa do geh bơta bơtàu tơnguh niam ngan, ngan là tàm broă tàm pơgơl mpồl kwang bàng lòt còp bal mờ gơ̆p mờ tìp mat ală kwang bàng kấp dờng. Broă bơt bơtàu bơta pin dờn cíñ trị, ngan là kwang đơng lam bồ kấp dờng 2 lơgar là bơnàng jă kwơ màng lơh geh bơta pràn lam lài tàm lơh broă bal đah 2 gah. Mơya, ală cồng nha lơh broă bal đah 2 gah kung gam ờ hềt ndrờm pal mờ bơta gĭt gơ̆p cíñ trị niam bơnĕ ngan, bơta ƀuơn bơta pràn đah 2 lơgar dê.

Tàm ală bơta hơ̆, Phó Củ tịc lơgar sồr 2 gah pơn jat tai sơlơ tơnguh tàm pơgơl mpồl kwang bàng ală kấp lòt còp bal mờ gơ̆p, ngan là kwang bàng kấp dờng. Mơkung sơlơ tơnguh bơyai lơh ală broă lơh gơ hòi gơ jà kă bro, bơcri priă, crơbơyai mpồl lơh sa kă bro, sơlơ tơnguh tăc mờ blơi ală bơta phan geh bơta ƀuơn bơta pràn bal mờ gơ̆p dê. Đại sứ lơgar Qatar đơs nền, lơgar Việt Nam là lơgar lơh broă bal kwơ màng bơh lơgar Qatar dê tàm tiah câu Á- Thái Bình Dương mờ hơ rơ̆p pơnđơl pràn lơh ngan mờ sơlơ tơnguh rlau tai bơta gĭt gơ̆p lơh bơyô bal đah 2 lơgar dê.