Phó Củ tịc lơgar Võ Thị Ánh Xuân, Phó Củ tịc dơ̆ Dùl Mpồl duh broă pơrlòng pơn jờng Dà lơgar tus pơrjum bal. Pơn jăt tai ală cồng nha neh lơh geh tàm nam pa do, nam 2024, ƀòn dờng Hải Phòng ai jơnau kờñ gơguh lơh sa mpồl bơtiàn pràn kơl dang mờ ală jơnau kờñ geh uă rơlao mờ nam 2023, tàm hơ̆ geh: khà gơguh phan geh lơh tàm ƀòn dờng GRDP bơh 11,5% tus 12%; Khà gơguh lơh sa mờ măi mok IIP gơguh 15%; Kờp jơh priă tă tàm kes priă Dà lơgar tàm ƀòn dờng geh rơlao 106 rơbô 761 tơmàn đong; Hòi jà bơcri priă lơgar bơdìh geh bơh 2 tơmàn tus 2 tơmàn 500 tơlăk dolar Mỹ.

Nàng lơh geh jơnau kờñ do, ƀòn dờng Hải Phòng neh ai geh ờ uă kơnòl broă mờ broă lơh tờm, tàm hơ̆ tơrgùm broă pờ ơnàng lơh sa, tam gơl pa broă gơguh lơh sa, lơh niam wơl lơh sa jăt gùng dà bơtàu tơngu 3 bơta tờm: Lơh sa mờ măi mok kông nghệ kao, anih ơhò ơm – logistics, lòt nhơl – kă bro; lơh pràn broă lơh niam sră nggal, sền gàr adăt boh lam, lơh jăt broă rơndăp săp sèng broă lơh kấp kơnhoàl, kấp xã; rơcang sơndră mờ sa kuề sa koà, lơh jăt tềm pềr, sơndră mờ hoàc huơr.