VOV4.K’ho- Drim ngai 05/7, tàm hìu lơh broă Quôk hội, Phó Củ tịc Thường trựk Quôk hội ồng Trần Thanh Mẫn neh wă Mpồl duh broă kwang bàng kâp hơ đơm lơgar Indonesia (hơ̆ là Thượng viện) bơh mò Sylviana Murin, Củ ñiệm Ủy ƀan lơh broă bal Nghị viện lơh kwang atbồ mpồl gam geh dơ̆ lòt còp mờ lơh broă tàm lơgar Việt Nam.

Phó Củ tịc Thường trựk Quôk hội ồng Trần Thanh Mẫn đơs niam dơ̆ lòt còp bơh mò Sylviana Murin mờ mpồl kwang bàng dê, đơs nền, Việt Nam sùm sền dờng màng mờ kơp kờñ bơtàu tơnguh rlau tai git gơp lơh bơyô ờs mờng mờ Lơh broă bal jŏ jòng mờ Indonesia. Nam 2023 là nam lơh tềl tòm 10 nam 2 lơgar lơh git gơp lơh broă bal jŏ jòng. Bè hơ̆ den tàng tơngai tus, 2 gah pal lơh broă bal jơh nùs rlau tai nàng ai git gơp lơh broă bal jŏ jòng gơguh tus khà pa, ngan là gah lơh broă bal Nghị viện nàng dipal mờ git gơp lơh broă bal jŏ jòng 2 lơgar.

Cau mblàng K’Duẩn