Kung tàm dơ̆ lòt lơh broă tus bal Pơrjum kwang bàng kấp dờng bè Hiệp ướk priă jền gùt plai ù pa mờ lơh broă tàm lơgar Tây, ngai 21/06, Phó Thủ tướng Cíñ phủ ồng Trần Hồng Hà tus còp Anih lơh broă Bơtàu tơnguh lơgar Tây (AFD) mờ geh dơ̆ lơh broă mờ mò Marie Helene Loison, Phó Kwang atbồ dờng AFD, mờ ală Kwang bàng kấp dờng bơh AFD dê.

Tàm dơ̆ lơh broă, Phó Thủ tướng Cíñ phủ tơngŏ bơta chờ hờp tềng đap ală broă bơtàu tơnguh niam ngan tàm bơta gĭt gơ̆p đah lơgar Việt Nam mờ Tây, ngan là tàm lơh broă bal lơh sa, dùl tơngume tờm kwơ màng tàm bơta gĭt gơ̆p lơh broă bal jŏ jòng đah 2 lơgar dê. Bàr lơgar ring bal sơlơ tơnguh lơh broă bal rlau tai đah AFD mờ Việt Nam tàm gah ntrờn năng lượng, ngan là tàm tơngai Việt Nam neh geh ală jơnau hơ pơr gon pràn kơl dang tàm Pơrjum COP26 mờ lam lơh bơta gĭt gơ̆p lơh broă bal tam ntrờn năng lượng ring bal; pơn jat tai pơgồp bal lam lơh geh cồng nha ală rơndap broă lơh lơh sa drơng broă ai bơtàu tơnguh kơ̆ kơljap tàm lơgar Việt Nam.