Pe ƀòn tàm xã Lợi Hải kờp jơh geh 2 rơbô 80 hìu, tàm hơ̆ làng bol kòn cau Rơglai geh rơlao 82%. Ală nam do, kơnờm mờ broă lơh jăt broă tam gơl phan tam, phan ròng mờ ală rơndăp broă tơmù rơƀah, làng bol bơcri priă bơtàu tơnguh lơh sa geh cồng nha, priă geh ring niam rơlao.

Bơdìh hơ̆ tai, geh Dà lơgar sền gròi, bơcri git nđờ rơhiang tơmàn đong lơh tơl ală broă lơh gùng che ồs đèng, gùng lòt, hìu sơnơm, dà ngui sa, di pal niam mờ broă kờñ tàm rài kis làng bol dê. Đơs tàm ngai chờ, Phó Thủ tướng ồng Lê Minh Khái đơs tờm, ngai chờ là dơ̆ nàng ală kấp ủy Đảng, gơnoar atbồ tìp măt mờ iăt jơnau đơs bơh làng bo dê; git nùs nhơm, jơnau kơ̆p kờñ bơh làng bol; bal mờ làng bol cri bơyai, bơ̆t bơtàu broă lơh mùl màl geh cồng nha ală kơnòl broă cíñ trị, bơtàu tơnguh lơh sa mpồl bơtiàn, sền gàr dà lơgar lơngăp lơngai, bơh tŭ hơ̆ tơnguh bơta ring niam tàm mpồl bơtiàn, tơnguh mpồl tam klăc dờng gùt jơi bơtiàn.