Chờ gờm ồng Charles R. Kaye, Kwang atbồ đơng lam Kông ty Warburg Pincus, dùl tàm ală Kes priă bơcri lam lài ngan lơgar Mỹ tus còp mờ lơh broă tàm lơgar Việt Nam, Phó Thủ tướng ồng Lê Minh Khái đơs loh, lơgar Việt Nam sùm sền lơgar Mỹ là dùl tàm ală lơgar lơh broă bal kwơ màng lài ngan.

Đơs niam Kông ty Warburg Pincus neh lơh broă geh cồng nha ờ uă mpồl lơh sa kă bro dờng, geh bơngă pin dờn tàm lơgar Việt Nam dê, Phó Thủ tướng kơ̆p kờñ Kông ty Warburg Pincus pơn jăt tai kơlôi sơnơng, rề ơnàng bơta git gơ̆p lơh broă bal mờ ală mpồl lơh sa kă bro lơgar Việt Nam dê, bơcri priă geh cồng nha tàm ală rơndăp broă lơh pa. Hòi jà Kông ty Warburg Pincus mờ mpồl cau năc geh uă tàm dunia geh pơn jăt tai là anih tơrbŏ bal nàng ai ală cau bơcri priă lơgar Mỹ đơs is mờ lơgar bơdìh đơs bal tus bơcri priă tàm lơgar Việt Nam. Rơcang geh pơn jăt tai rề ơnàng bơcri priă tàm lơgar Việt Nam bơh Kes priă dê tàm tơngai tus, ồng Charles R. Kaye pà git, tŭ do geh uă ngan mpồl lơh sa kă bro dờng bơh lơgar Mỹ đơs niam ngan mờ tơlik nùs nhơm sền gròi tus mờ broă bơcri priă tàm drà kă bro geh uă bơta pràn lơgar Việt Nam dê; mờ đơs tus ờ uă jơnau dan gơwèt mờ kwang đơng lam Cíñ phủ lơgar Việt Nam dê.