Jăt jơnau yal tàm pơrjum, tơngai bơh nam 2021 tus 2025, ală càr Tây Nguyên geh Dà lơgar jào rơlao 11 rơbô 700 tơmàn đong nàng lơh 3 broă lơh jăt jơnau kờñ dà lơgar. Khà priă do geh rơlao 11,73% khà priă bơcri tàm broă tơnguh bơtàu bơh dà lơgar ai 3 broă lơh jăt jơnau kờñ dà lơgar tàm gùt lơgar dê.

Mìng is tàm nam 2022, dà lơgar tă rơlao 3 rơbô 878 tơmàn đong mờ ală càr Tây Nguyên neh ai rơlao 870 tơmàn đong priă bơh kes priă ală càr nàng lơh jăt ală broă lơh. Tus ngai 31 nhai 12 nam 2022, ală càr tàm tiah do mìng rơ̆p bơcri 34% khà priă dà lơgar jào, ờ uă rơlao mờ bơta pràn bơcri priă bè ờs gùt lơgar dê. Nhai 01 nam 2023, neh geh 3 tàm 5 càr là Kon Tum, Lâm Đồng, Dăk Nông neh lơh gơs broă tam pà priă nam. Bơh tàm mùl màl ală kal ke tàm Tây Nguyên, kwang đơng lam ală càr neh dan geh ờ uă broă lơh nàng Cíñ phủ sền wơl, Phó Thủ tướng ồng Trần Lưu Quang sồr ală càr gờñ lơh gơs broă jào priă; ngui priă di pal gơwèt mờ tơl broă lơh; sồr ală anih lơh broă, ƀộ, gah lơh broă dà lơgar lơh jăt mơ broă sền wơl, lơh gơs ală kơrnoăt bal gam ờ tơl. Bè đah ală càr, Phó Thủ tướng sồr pơn jăt tai lơh mhar ală broă gam lơh; tơnguh broă pơgồp bal đah ală càr mờ ƀộ, gah lơh broă dà lơgar, mờ broă pơgồp bal tàm ală anih lơh broă, mpồl lơh broă bơh tơl càr tàm broă lơh jăt.