Broă do bơh Liên đoàn kă bro mờ lơh sa mờ măi mok Việt Nam (VCCI) mờ Cơldŭ kă bro mờ lơh sa mờ măi mok Nhờk pơgồp bal bơyai lơh. Broă do geh kuơ ngan ngồn tơngkah 50 nam ngai lơh bơta git gơp cribơyai broă mờ lơgar ndai Việt Nam- Nhờk, sơn đờm bơh ròt ală broă lơh lơh bal đah mpồl lơh sa kă bro 2 lơgar bơh VCCI pơgồp bal mờ ală mpồl lơh broă bal lơgar Nhờk geh lơh tàm nam do.

Đơs tàm dơ̆ cribơyai, Phó Thủ tướng ồng Trần Lưu Quang pà git, 2 lơgar kung gam uă ngan bơta pràn, bơta ƀuơn lơh broă bal, tàm bơ tơl bal mờ gơp, wèt tus 50 nam ngai lơh bơta git gơp cribơyai broă mờ lơgar ndai, 2 gah geh pơgồp bal bơta pràn, tă pơgồp nàng git gơp 2 lơgar geh lơh geh uă cồng nha dờng màng rlau tai tàm gah lơh sa. Tơngai tus, 2 lơgar Việt Nam mờ Nhờk pal pơn jat tai sơlơ chồl pràn lơh broă bal bơcri priă, ngan là tàm ală gah lơh sa mờ măi mok tờm.