Do là mpồl nghị sĩ câu Âu dơ̆ 3 tus còp lơgar Việt Nam kờp bơh bồ nam tus tŭ do, ai tơnggŏ bơta sền dờng màng bơh Mpồl tam klac câu Âu dê gơ wèt mờ broă sơlơ tơnguh bơta git gơp lơh broă bal li la mờ Việt Nam. Tàm dơ̆ wă, Phó Thủ tướng ồng Trần Lưu Quang đơs nền, Việt Nam sền dờng màng ngan mờ kơp kờñ sơlơ tơnguh bơta git gơp mờ Mpồl tam klac câu Âu. Phó Thủ tướng kơp kờñ 2 gah sơlơ tơnguh lơh broă bal tàm ală gah, ngan là ală gah gam là gùng dà bal bơh dunia dê mờ EU geh bơta pràn bè bơtàu tơnguh tơlir, bơtàu tơnguh kơ̆ kơljap, năng lượng lơh geh wơl, sơndră mờ tam gơl trồ tiah,… bơh hơ̆ pơgồp bơnah sơlơ tơnguh bơta git gơp lơh broă bal mờ lơh broă bal tơl làm đah Việt Nam mờ EU ngai sơlơ bơtàu tơnguh jrô ơnàng, ngan ngồn.

Phó Thủ tướng sồr Ủy ƀan câu Âu gờñ tă bơsong jơnau kơryan gơ wèt mờ phan tàm dà bơh lơgar Việt Nam dê jat bơta sền sơ wì niam bè ală bơta pơn đơl pràn jơh nùs mờ ngan ngồn bơh Việt Nam dê tàm broă rơcang sơndră tơnhàu phan tàm dà lềng tìs mờ adat boh lam.