Jat jơnau yal bơh Ƀộ Kế hoạc mờ Đầu tư dê, Rơndăp ù tiah ai jơnau kờñ tus nam 2030, tiah Ring dà dờng Hồng bơtàu tơnguh mhar, kơ̆ kơl jăp, geh rơndăp tăp sèng lơh sa di pal, cèng bềng bơhiàn niam chài jơi bơtiàn dê; tơrgùm bơtàu tơnguh lơh sa mờ măi mok, drơng broă tơngai pa mờ lơh sa suơn sre kông nghệ kao; hữu kơ, tơlir, tàm pơ dar geh priă lơh sa uă; gơ gơs anih tờm bơto bơtê mpồl cau lơh broă jak, cau lơh broă sồ bơh gùt lơgar dê; lòt lài bè bơtàu tơnguh khoa họk- kông nghệ, tam gơl pa bơceh lơh, tam gơl sồ, lơh sa sồ, mpồl bơtiàn sồ; geh phan bơna bơt bơtàu lơh sa- mpồl bơtiàn dùl ròt bal, pa ngan, tiah drà ngăc ngar, geh bơta tàm tơrbŏ bal uă.

Đơs pơn dŭt pơrjum, Phó Thủ tướng Trần Hồng Hà sồr: Rơndăp ù tiah kờñ pal lơh loh rlau tai bơta krơi is bơtàu tơnguh kơnhoàl ù tiah dê, bơta ƀuơn geh di broă di anih, bơta krơi is ù tiah kơnhoàl dê, bơh hơ̆ hơ̆ sồng gơtùi bơt bơtàu geh Rơndăp ù tiah cèng bềng bơta kơnhoàl ù tiah, geh bơta tờm, chồl tơnguh bơta bơtàu tơnguh bơh kơnhoàl ù tiah dê pơgồp bal mờ gơnoar broă lơh sa, cíñ trị gùt lơgar.