Jơnau rcang cih Rơndăp ù tiah ai jơnau kờñ tus nam 2030, gùt lơgar geh 173 anih ơhò lơh ka in ơm. Tiah dà lềng tàm gùl lơgar (bơh Quảng Trị tus Bình Thuận) rơ̆p là tiah tơrgùm uă anih ơhò lơh ka in ơm uă rlau jơh gùt lơgar, mờ 82 anih ơhò lơh ka in ơm. Gùt lơgar rơ̆p geh 160 tiah pleh mìu càl rbŭt dờng ai ơhò lơh ka in ơm, lơh geh jơnau kờñ tiah pleh ai pơgap rlau 90 rơbô ơhò lơh ka in ơm.

Đơs pơndŭt pơrjum, Phó Thủ tướng Trần Lưu Quang đơs sùm, bàr pe jơnau pal jat tờm ngan tàm broă rơndăp ù tiah, lài ngan là jơnau rcang cih Rơndap ù tiah pal là di pal mờ ală rơndăp ù tiah gam geh mut ngui ngan ngồn tŭ do; ală tơngume ờ hềt di pal halà geh bơta tàm pìt tam phà den pal đơs nàng tam gơl wơl. Tàm hơ̆, rơndăp ù tiah pal bơsong ală broă gơwèt bè bơta gam geh tŭ do, pal kờp tus ală broă gơwèt gùng dà broă lơh, pơlam gùng dà ai rài tơnơ̆ do in, bè: tam gơl sồ, rcang sơndră mờ tam gơl nhơm trồ tiah.