Jat jơnau yal bơh Ƀộ Nội vụ dê, lam lơh broă rơndap sap sèng mpồl kwang bàng duh broă dà lơgar mờ rơndap sap sèng wơl ală anih lơh broă dà lơgar, ală càr, ƀòn dờng neh tơrmù 13 sở mờ mpồl lơh broă sră pơ àr gơnoar atbồ ndai gơ wèt Ủy ƀan Ñân zân càr; tơrmù rlau 2 rbô 500 cơldŭ lơh broă mờ ndrờm mờ cơldŭ lơh broă gơ wèt anih lơh broă ờs mờng Ủy ƀan Ñân zân càr, kơnhoàl dê; mờ kung pơn jat tai kờp sền, rơndap tap sèng wơl anih lơh broă dà lơgar, kờp tus jơh nam 2023 neh tơrmù rlau 7 rbô 800 anih lơh broă dà lơgar.

Đơs tàm pơrjum, Phó Thủ tướng Trần Lưu Quang cih dờp, jờng rơ ală broă lơh ngan, bơta pơn đơl pràn, nùs nhơm geh kơnòl bơh mpồl kwang đơng lam bồ, kwang bàng, công chức, viên chức, cau lơh broă dê mờ cồng nha lơh geh bơh jơh gùt gah Nội vụ dê tàm nam 2023. Tàm hơ̆ geh uă gah broă kal ke, ƀuơn gơ rềng.