Mho òr (30/10), Kes priă Rơcang sơndră mờ Chơ̆t jê câu Á (Kes priă AIP) pơgồp bal mờ Mpồl sền gàr lơngăp lơngai gùng lòt càr Gia Lai bơyai lơh tơn jơh 5 nam lơh jăt rơndăp broă “Tơmù bơta ntoăt jờl – Hìu bơsram lơngăp lơngai” tàm ƀòn dờng Pleiku. Pơrjum neh sền wơl, tơnơ̆ 5 nam lơh jăt rơndăp broă, Ƀòn dờng Pleiku neh gơs ƀòn dờng lam lài ai tiah hìu bơsram lơngăp lơngai tàm càr Gia Lai mờ tiah Tây Nguyên dê.

Jăt jơnau đơs bơh Sở Giao thông – Vận tải càr Gia Lai dê, tơnơ̆ mờ 5 nam lơh jăt rơndăp broă, tàm ƀòn dờng Pleiku neh geh 33 hìu bơsram kấp 1 geh lơh niam wơl tiah gùng lòt jơng, tiah kơ̆p, rò kơnòm bơsram geh gàr niam bơta lơngăp lơngai; bơta jờl uă ngan bơh ală rơndeh lòt tàm gùng tŭ lòt gan tiah mpồng hìu bơsram tàm dơlam ƀòn dờng là 30 kơi sồ tàm 1 jơ mờ hờ bơdìh ƀòn dờng là 40 kơi sồ tàm 1 jơ. Tàm khà do geh 71% geh sră dờp lơngăp lơngai tàm khà 5 sơrmañ. Rơndăp broă do neh dong kờl lơh tơmù ờ uă ngan cau gơtìp chơ̆t jê mờ khà dơ̆ gơtìp rềs àr tàm gùng lòt tàm tiah hìu bơsram. Tŭ do, càr Gia Lai kung neh lơh broă rơndăp lơh niam wơl 56 hìu bơsram tàm ală gơl gùng lòt tàm càr tàm tơngai tus mờ wèt tus lơh jăt broă lơh do tàm gùt càr, tàm hơ̆ uă ngan là tàm ală xã tiah ngài.