Thứ trưởng ồng Phạm Ngọc Thưởng- Kwang atbồ Mpồl đơng lam kấp dà lơgar dơ̆ Pơrlòng jơh bơsram kấp pe nam 2023 đơng lam pơrjum ƀăo. Dơ̆ pơrlòng jơh bơsram kấp pe nam do geh rlau 1 tơlak nă cau pơrlòng cih mat tus bal dan pơrlòng. Bơh 2 ngai pơrlòng khà cau pơrlòng tus pơrlòng lơh geh khà 98,86%. Jơh gùt lơgar geh 2 rơbô 272 tiah pơrlòng mờ 43 rơbô 032 cơl dŭ pơrlòng.

Đơs bơh sơnrờp, broă lơh rcang bơyai lơh dơ̆ pơrlòng geh rcang lài, niam mờ tơl làm. Broă bơyai lơh sền pơrlòng tàm jơh ală tiah pơrlòng gàr geh bơta niam; jơnau pơrlòng gơ ơm tàm jơnau bơto bơtê kấp pe dê, jat tàm ală jơnau bơsram gĭt wă, bơta chài, geh bơta tam cah is di pal, lơh geh jơnau kờñ jat tàm ală bơta hơ̆ nàng sền sơ wì dờp jơh bơsram kấp pe mờ yal ală jơnau di ngan nàng ală gah bơto bơtê đại hok, bơto bơtê broă lơh in sền sơ wì mờ ngui tàm broă sac rơwah cau mut bơsram. Broă lơh rcang sơndră blăc pơrlồm kông nghệ neh geh lơh niam, mơya tàm tŭ sền pơrlòng, ngan là gam geh bàr pe nă cau pơrlòng kơl dang nùs lơh tìs mờ jơnau pal jat  ngui điện thoại tàm cơdŭ pơrlòng mờ bàr pe nă cau pơgru ờ hềt lơh jat di, tơl broă lơh geh sồr tŭ sền pơrlòng. Ngan là, geh 41 nă cau pơrlòng gơtìp ờ dờp pơrlòng. Tàm dơ̆ pơrjum ƀăo, ala mat Ƀộ Giáo dục mờ Đào tạo kung hơ uă jơnau lùp kal ke bè broă ai tơlik jơnau pơrlòng; gĭt lài jơnau pơrlòng tàm Cao Bằng mờ Yên Bái…