VOV4.K’ho- Drim ngai 04/7, tàm Hà Nội, Cơldŭ lơh broă Củ tịc lơgar pơgồp bal mờ Ƀộ Kwang àng, Ƀộ Ngoại giao mờ Viện Kiểm sát Ñân zân jơnhua ngan rlau jơh dà lơgar bơyai lơh pơrjum ƀău yal kơrnuat bè toh glài nam 2022 bơh Củ tịc lơgar Việt Nam dê di ngai 02/9 mờr tus.

Jat hơ̆, cau geh toh glài nam do geh cau gam lơh jat kơrnuat lơh glài kup jàm geh tơngai hơ pơrgon, cau gơtìp lơh glài jàm jơh rài kis neh geh tơrmù kup jàm geh tơngai hơ pơrgon, cau gam geh ơm ing broă lơh jat kơrnuat lơh glài kup jàm. Tơngai neh lơh jat kơrnuat lơh glài kup jàm nàng geh sền sơ wì toh glài kờp tus ngai 31/8/2022. Jơnau yal bè khà cau geh toh glài dơ̆ do, Thiếu tướng Nguyễn Văn Long, Thứ trưởng Ƀộ Kwang àng pà git, toh glài pal sền sơ wì jat broă rơndap lơh den tàng ờ hềt geh khà mùl màl; ală cau geh tơl bơta den geh toh glài. Tŭ geh sền sơ wì toh glài den jơh ală cau jàm ndrờm ring bal mờ gơp dilah geh tơl bơta ndrờm geh sền sơ wì lơm.

Cau mblàng K’Duẩn