Đơs tàm pơrjum, ala mat ală càr Gia Lai, Kon Tum, Dăk Nông, Dăk Lăk, Bình Phước neh geh ală jơnau dan ngan ngồn ngan, nàng kờñ sơlơ tơnguh lơh broă bal lơh sa, mpồl bơtiàn đah ală càr tiah nhàr dà lơgar. Bè đah càr Gia Lai, Ủy ƀan Ñân zân càr dan Quôk hội 3 lơgar geh ală gùng dà broă lơh dong kờl kuơmàng ai tiah Pe mum bơtàu tơnguh in bè broă lơh bơcri priă dong kờl dia, gùng dà broă lơh hòi jà priă bơcri, sơlơ tơnguh lơh broă bal lam lơh ală rơndap broă lơh bè lơh sơnơm đah 2 lơgar.

Tơn jơh dơ̆ lơh broă, ồng Vũ Hải Hà, Kwang geh jơng Ƀan Cấp hàñ Đảng dà lơgar, Kwang atbồ Ủy ƀan lơh broă mờ lơgar ndai bơh Quôk hội lơgar he dê pà git, ală jơnau đơs geh kuơ dờng màng ngan nàng Quôk hội 3 lơgar pơn jat tai lòt bal, sơlơ lơh geh gùng dà broă lơh ai tiah do in, sền gàr lơngăp lơngai, lơh gùng nhàr lơgar ring lơngai, lơh bơyô bal mờ bơtàu tơnguh, ai bơta git gơp 3 lơgar, 3 Quôk hội ngai sơlơ bơtàu tơnguh tàm jơh ală bơta.