Đơs sơnđờm mŭt pơrjum, Củ tịc Quôk hội ồng Vương Đình Huệ sồr ală kwang bàng Quôk hội kơlôi sơnơng nền nòn, mblàng sền, sền swì di mờ bơta geh ngan, dipal, tơl ală bơta ală cồng nha neh lơh geh; sơñio loh ală bơta gam gơkòl, ờ hềt dipal; sồr geh mờ tă pơgồp yal tơngĭt ală broă lơh nàng kờñ lơh geh cồng nha jơnhoa ngan rlau jơh bơh nam 2023 dê; sền swì lơh nền jơnau kờñ, broă jàu mờ ală kơnòl broă, broă lơh jăt broă rơndăp lơh bơtàu tơnguh lơh sa- mpồl bơtiàn, priă jền, kes priă dà lơgar nam 2024.

Bal mờ hơ̆, Quôk hội rơ̆p sền swì, lơh nền broă tam gơl bàr pe tơngume bơh Kơrnoăt 53 dê bè Jơnau yal kơlôi sơnơng gơtùi lơh jăt ngan ngồn Rơndăp broă lơh ai wơl ù, tơm wơl, dong kờl, ntrờn ơm kis pa Ƀlàng rơndeh par dunia Long Thành; sền swì cồng nha broă lơh jăt Kơrnoăt 43 bè gùng dà broă lơh nam priă jền, priă tơm dong kờl Broă lơh bơtàu tơnguh wơl mờ bơtàu tơnguh lơh sa- mpồl bơtiàn; cồng nha kờp sền ală adat boh lam jăt jơnau sồr tàm Kơrnoăt sồ 01 bơh Quôk hội khoă XV dê.

Drim òr (23/10), tàm pơrjum dơ̆ 6, Quốk hội khoă XV, Thủ tướng Cíñ phủ ồng Phạm Minh Chính neh sền jơnau yal cồng nha lơh jăt broă rơndăp lơh bơtàu tơnguh lơh sa mpồl bơtiàn nam 2023; kờp dŭ broă rơndăp lơh bơtàu tơnguh lơh sa mpồl bơtiàn nam 2024.

Jăt jơnau yal, lơh sa mpồl bơtiàn pơn jăt tai geh brồ guh wơl, geh jăt mờ jơnau kờñ tơrgùm geh ai; Lơh sa lơgar Việt Nam pơn jăt tai là tiah àng bơh lơh sa gùt plai ù dê. Broă bơ̆t bơtàu wơl lơh sa pơn jăt tai geh lơh pràn; tus bal lơh pràn broă tam gơl sồ; ală gah niam chài, mpồl bơtiàn geh sền gròi bơcri priă bơtàu tơnguh, lơh geh cồng nha loh làng rơlao. Tàm tơngu me cồng nha bơh 9 nhai, kờp dŭ gùt nam 2023 lơh ngan geh bơh 10 tàm 15 broă lơh geh mờ sơrlèt jơnau geh ai. Bal mờ hơ̆ Thủ tướng neh ai tơngŏ jơnau kờñ tơrgùm bal, mờ kung đơs loh 12 kơnòl broă, broă lơh tờm nam 2024 mờ tơngai tus, tàm hơ̆ đơs nền 15 broă lơh tờm bè ală gah lơh sa, mpồl bơtiàn, tiah kis.