Đơs tơn jơh dơ̆ pơrjum, Củ tịc Quôk hội Vương Đình Huệ đơs sùm, nam 2024 là nam nggùl tơngai lơh broă dê, geh gơtha dờng màng ngan tàm broă lơh jăt geh cồng nha bơh jơh gùt tơngai lơh broă dê. Den tàng bè hơ̆, kờñ pal pơn jăt tai ai lài dong kờl gơguh lơh sa, gàr kơ̆ lơh sa dờng, gròi sền roh giă priă, lơh jăt ală jơnau kờñ, jơnau sồr tam gơl pa gơguh lơh sa, rơndăp tăp sèng wơl rài lơh sa, lơh niam wơl tiah bơcri priă lơh sa kă bro, tơnguh uă cồng nha lơh geh, bơta niam, lơh gơtùi, bơta pràn tàm pơrlòng mờ pràn jak dơlam is bơh rài lơh sa dê, jăt tàm bơta chồl tơnguh ală broă bơtàu tơnguh pràn kwơmàng.

Củ tịc Quôk hội sồr, pơn jăt tai kờp sền, lơh sir adat boh lam, kơrnoăt boh lam, gùng dà, broă lơh, ală rơndăp ù tiah, broă rơndăp lơh dà lơgar, kơnhoàl ù tiah, gah lơh broă, càr, gơ jăt bal mờ lơh pràn lơh tam gơl wơl lơh sră pơ àr gơnoar ătbồ dê. Củ tịc Quôk hội kung tơngkah sơl, ală kâp, ală gah lơh ngan lơh jăt geh cồng nha ală broă dong kờl sền gàr niam rài kis mpồl bơtiàn, sền gròi rài kis phan bơna, nùs nhơm làng bol dê, rơcăng lài wil tơl ală bơta drơng làng bol in chờ hờp wă rò sơnam pa 2024 mờ sa tềp bơhiàn dà lơgar dê Giáp Thìn, lơh bè lơi nàng jơh tơl hìu, tơl nă cau ndrờm geh chờ hờp wă rò sơnam pa, sa tềp ram mhŭ.