Tàm dơ̆ 2 do, Quốk hội pơrjum sùm bơh ngai 19 tus jơh ngai 24 nhai 06. Quốk hội pơn jăt tai cri bơyai bè 10 rơndăp broă cih adăt, sền wơl, pờ tê ring bal 8 adăt, 11 Nghị quyết. Tàm drim òr (19/06), pơgồp jơnau đơs tàm rơndăp broă cih Adăt Hìu ơm (tam gơl), ală kwang bàng sồr geh ai tơngai ngui hìu ơm bal jăt tơngai bơh broă lơh dê.

Jơnau geh ai bè hơ̆ geh cèng wơl bơta kwơ ai làng bol ngui hìu mờ mpồl bơtiàn... Broă lơh geh uă hìu ơm mpồl bơtiàn jăt broă lơh ai ơpah kung geh uă kwang bàng tàm kơn dang jòi geh broă lơh niam ngan ai broă dong kờl hìu ơm mpồl bơtiàn in. Ală kwang bàng đơs niam rơndăp broă cih Adăt neh wèt tus broă tơmù ală bơta gơlik geh, ờ pràn bè broă lơh hìu ơm, bơcri priă, hìu ơm mpồl bơtiàn, bè atbồ hìu ơm. Jăt ồng Nguyễn Văn Hiển, mpồl kwang bàng càr Lâm Đồng đơs, pal tơrgùm tàm jơnau kờñ tờm ngan bơh broă lơh geh uă hìu ơm mpồl bơtiàn dê, di pal mờ broă kờñ geh hìu ơm di pal ai làng bol in, ờ gŏ di là di pal mờ broă kờñ ngui hìu ơm.