Pơrjum geh tàm tơrbŏ bal pờ tơlik tơn tàm internet tus Ủy ƀan Ñân zân 28 càr, ƀòn dờng kềng gah dà lềng mờ ală Ƀộ, gah broă lơh dà lơgar geh gơ rềng. Đơs tàm dơ̆ pơrjum, Phó Thủ tướng Cíñ phủ Trần Lưu Quang đơs nền, jơnau gơ lời wơl bơh broă ờ gơtùi tă tơn jơh “Sră lơh glài” bơh EC dê mờ dilah gơtìp “Sră kơryan jơh ală bơta” den ờ mìng gơtìp hoàc huơr bè lơh sa mờ gam lơh bơngă pin dờn bơh lơgar Việt Nam dê gơtìp gơ mù kơn jơ̆ ngan, gah lơh phan tàm dà digơlan pal kong mờ jơnau pơhìn ndrờm bè “jơnau lơh glài” tàm ală drà kă bro ndai bơdìh EU.

Phó Thủ tướng sồr ală mpồl lơh broă geh gơnoar lơh jat adat boh lam tàm dà lềng sơlơ tơnguh tai broă lòt sền, gròi sền nền nòn, ờ lời ơhò kup ka lơi lơh tìs tiah dà lềng lơgar ndai dê. Ƀộ Kwang àng mhar lùp khàu, git nền ală broă gơ rềng tus broă lơh tìs dờp git phan tàm dà; lơh sir sră nggal, cah rơña ală broă lơh kòn gùng ai ơhò lơh ka, cau lơh ka Việt Nam lòt tơnhàu phan tàm dà lềng tìs mờ adat boh lam tàm tiah dà lềng lơgar ndai.