Pơrjum geh gơtha kwơ màng tàm broă lơh jat geh cồng nha gơnoar broă bơh Mpồl duh broă đơng lam pơgồp bal tiah Tây Nguyên dê, cribơyai bal bè ală bơta “kal ke”, “bơta gơ kòl” bơtàu tơnguh gam geh mờ ai geh jơnau kờñ, rơndăp broă lơh, broă lơh bơyai lơh jăt tàm tơngai tus; chồl tơnguh lơh bal tàm tiah do mờ ală tiah nàng wèt tus jơnau kờñ bơtàu tơnguh Tây Nguyên “Tơlir- Bơnĕ bơnài mờ Kơ̆ kơl jăp”.

Ala mat ală Ƀộ, ngàñ Dà lơgar, ală tiah tàm tiah Tây Nguyên, ală kwang bàng mờng chài lơh broă mờ cau jak chài neh tus bal pơrjum mờ tă pơgồp jơnau đơs tàm jơnau rcang cih rơndăp ù tiah. Tus tŭ do, rơndăp ù tiah Tây Nguyên neh geh pơyoa tus ală Ƀộ, ngàñ, ală tiah nàng dan jơnau đơs. Ƀộ neh dờp geh uă jơnau đơs tă pơgồp kwơ ngan nàng hời rơ hời lơh sir rơndăp ù tiah mờ tơnơ̆ pơrjum dơ̆ 2 do, kung gam kơ̆p tai ală jơnau đơs tă pơgồp bơh ală Ƀộ, ngàñ, ală tiah mờ ală cau jak chài dê nàng Rơndăp ù tiah bơtàu tơnguh tiah Tây Nguyên ngan ngồn di pal mờ broă lơh kwơ màng bơtàu tơnguh bơh Dà lơgar dê, ai Tây Nguyên bơtàu tơnguh tơlir mờ kơ̆ kơl jăp, gơ dờp mờ tam gơl nhơm trồ tiah.