Đơs mut pơrjum, Thủ tướng Cíñ phủ Phạm Minh Chính sồr pơrjum mblàng lơh loh, sền sơ wì broă đơng lam, sồr lơh bơh Cíñ phủ dê tàm nam 2023 neh di, neh tơl mờ loh làng halà ờ hềt? Bơta pa tàm broă đơng lam, sồr lơh nam 2023 là ñchi? Tàm mùl màl, ală kâp, ală gah broă, ală tiah neh git loh broă gơlik geh mờ geh broă lơh dipal, di tŭ, geh cồng nha halà ờ hềt…

Đơs bè cồng nha bơtàu tơnguh lơh sa mpồl bơtiàn nam 2023, Thủ tướng đơs loh, broă lơh sa mpồl bơtiàn nam 2023 pơn jat tai geh tềl tơnggŏ bơtàu tơnguh wơl niam, nhai tơnơ̆ niam rlau mờ nhai lài, quý tơnơ̆ jơnhua rlau mờ quý lài, bol he neh gơtùi lơh geh jơnau kờñ tơrgùm bal ai tơlik là gàr kơ̆ broă lơh sa dờng, sền gròi bơta roh giă priă, sơlơ chồl pràn gơguh lơh sa, gàr niam lơngăp lơngai rài kis mpồl bơtiàn mờ rài kis làng bol dê geh tam gơl niam… Đơs bè broă sền sơ wì ală bơta gam ờ niam, kal ke, bơta lòng, Thủ tướng đơs loh, pal lơh loh tai jơnau tài bơh sền ờ sơp mờ đơs broă lơh ngan ngồn gơ wèt mờ 5 broă jàu ờ lơh gơtùi jat broă rơndap lơh nàng geh broă lơh ai nam 2024 in lam lơh geh cồng nha kơnòl broă ai tơlik.