Đơs tàm pơrjum, Thủ tướng Phạm Minh Chính jờng rơ bơta lơh ngan mờ cồng nha pal cih dờp ngan bơh jơh gùt kwang đơng lam bồ, công chức, viên chức, cau lơh broă gah Kế hoạc, Đầu tư mờ Tơrgùm kờp dê, pơgồp bơnah kuơmàng ngan tàm cồng nha bơtàu tơnguh lơh sa mpồl bơtiàn dà lơgar he dê tàm nam 2023 mờ tơngai lài.

Thủ tướng đơs nền, nam 2024 là nam tam gơl pràn, geh kuơ dờng ngan tàm broă lam lơh geh cồng nha broă rơndap lơh 5 nam, bơh nam 2021 tus nam 2025. Đơs lài broă tàm nam 2024 pơn jat tai kal ke mờ digơlan kal ke rlau mờ nam 2023. Ƀộ Kế hoạc mờ Đầu tư pal lơh niam gơnăp gơnoar mờ kơnòl broă geh jàu, ngui uă ngan rlau jơh gơnoar broă là anih lơh broă tă pơgồp jơnau đơs. Đảng, Dà lơgar, Cíñ phủ kơp kờñ mờ pin dờn Ƀộ Kế hoạc mờ Đầu tư sùm geh bồ tơngoh ngac ngan, jak ngan, tam gơl pa, git mhar ngan ală broă geh pơn rơ bơh dunia, dà lơgar dê mờ geh broă wèt sền jŏ jòng, tă pơgồp ală broă lơh dờng bè lơh sa mpồl bơtiàn ai Đảng, Quôk hội, Cíñ phủ in.