Drim ngai 26/12, tàm Hà Nội, Ƀộ Giáo dụk mờ Đào tạo đơng lam pơrjum mờ Ƀan Tuyên giáo Dà lơgar, Đoàn Ơruh pơnu kộng sàn Hồ Chí Minh Dà lơgar bơyai lơh dơ̆ pơrjum tơn jơh, jàu khà jờng dơ̆ pơrlòng pờ tơlik tơn tàm internet “Rơnàng kơnòm să bơsram mờ lơh jat bồ tơngoh, nùs nhơm, broă lơh mờ rài kis Hồ Chí Minh dê” nam 2023. Do là nam dơ̆ 9 dơ̆ pơrlòng geh bơyai lơh nàng kờñ lơh pràn broă bơsram mờ lơh jat bồ tơngoh, nùs nhơm, broă lơh mờ rài kis Hồ Chí Minh dê tàm đoàn viên, ơruh pơnu, kơnòm pa tàu mờ kơnòm dềt, kơnòm bơsram, cau bơsram dờng tàm lơgar mờ lơgar ndai. Dơ̆ pơrlòng nam do geh bơyai lơh bơh ngai 11 nhai 09 tus ngai 26 nhai 11 jat broă lơh pơrlòng trắc nghiệm tàm internet.

Tơnơ̆ rlau 3 nhai bơyai lơh, dơ̆ pơrlòng neh gơ hòi gơ jà geh rlau 2 tơlak 100 rơbô nă cau tus bal dan cih mat tus bal pơrlòng. Lòt gan ală dar pơrlòng sac rơwah, dar pơrlòng mut tàm nggùl, Mpồl bơyai lơh sac rơwah 186 nă cau pơrlòng geh cồng nha jơnhoa ngan rlau jơh mŭt tàm dar pơrlòng lồi dŭt săp sèng khà cau dùl nă să gùt lơgar. Tàm dơ̆ tơn jơh mờ jàu khà jờng dơ̆ pơrlòng, 90 nă cau dùl nă să lơh geh cồng nha jak ngan geh jàu khà 1,2,3 mờ 4. Mpồl bơyai lơh kung jàu khà jờng mpồl bal ai 10 hìu bơsram bơto bơtê geh khà kơnòm bơsram tus bal pơyoa jơnau pơrlòng uă ngan rlau jơh.